ASLB Sangdong

~ I. Temjen Tzüdir, Secretary, ASLB.

Ao Senden Literature Board-i asadanga arunung asen kini ita aser hopta ka nung anogo tenet züngya ya yimtsüng aser tzükong balalai tenüng balala jayaba angateta, nisung aika nungi shisa agidanger tang koba agütsür ibai Ao Senden Temelaba agir adoktsür. Anungji pei yimer aser tzükong nung jayaba ama kar mesüi liaka ajak lirumedemtsü asoshi ta angatetdaktsünür. Iba Zonizüng aser hopta nung anogo tenet züngyaji tang nungibo ajaki yamai dang amshitsü. Ibai taruba küm (2018) nungibo School nung azüngtsü Textbook nung enokogo.
A. Zonizüng Nüngja Ratet :
Asen tsüraburi Ita Anü dang “Zoni” ta aja aser ibaji lemsaa züngdangba agi ZONIZÜNG (Calendar) ta ajar. Yangji keta aliba teratet tongmelang agi yamai:
1. AENJETI (January): Küm nung mezüngbuba ita, tetezü akhi asen tsürabur mapang iba ita nung küm piyong atema tagitarutsü bushia bendang ter sema aenlen jajaba mapang, talisa tzümalen ramen memenatsü atema iba ita nung tetsübu kecha makai aenlen jajaba agi Aenjeti ta ajar.
2. TSÜKLAI (February): Iba ita nungi alu achiba apa manung mi-ronü mesüra mi jangrur amai apa tema nung tanela angutsü aser anüngdangbo tera lemyia mesüra ap-ashia tsüka akümer anungji Tsüklai ta ajar.
3. Metsüremi (March): Iba ita dang aluyimertemi metsü ita ta jaa metsü tapu teimbaka ali nung aremer mesüra tsünür, anungji Metsüremi ta ajar.
4. Rongchii (April): Iba ita nung aluyimertemi kümbok, atsüng aser leptsü amala leptoker ayuba terong nungi lanu adoka aliba koba dang “Rong” ta ajar ibai chia/lepa inyaker iba jagi Rongchii ta ajar
5. Monupii (May): Iba ita tetenzük (1-3) nung Moatsü amungtsü aser iba moatsü temli alu (Pen/Maipu) nung mo tila adoka aliba koba dang Monu ta ajar ibaji alulem agi pia tenzüker iba jagi Monupii ta ajar.
6. Aami (June): Iba ita nung tzünglu sashia arua ali kanga tayi akümer aser süngdonglidong ajak nung tu ka ka adoker saka iba ita nung Aamdong ka nung tu ana adoker iba jagi Aami ta ajar.
7. Chiteni (July): Iba ita nung aluyimeri tsünüsempongba teimbaka nungi süngjanglijang onga chia tenzüker anungji Chiteni ta ajar.
8. Luroi (August): Iba ita nung aluyimertem alu aror anungji Luroi ta ajar.
9. Rongjui (September): Iba ita ayongtem nung meyi tzü ajema akümdang ango aputsü rongju yanglua ango apur anungji iba ita dang Rongjui ta ajar.
10. Mongputeni (October): Küm shia iba ita nungi tenzüka mongpu (Tsüngküm) tenzüker iba jagi Mongputeni ta ajar.
11. Yimpoksüi (November): Akhidang asen tetsü tebou süchiba mapang alu roa renemkonemer tsüngküm tenzüka aodang shirnoki Süchitsü atemzüka ali parnoki iba ita nung sü chia yimkong tepok süngdakja chiyungdakja peletepdaktsür anungji iba ita dang Yimpoksüi ta ajar.
12. Luchii (December): Yimpoksüi (Nov) nung alu tasen achitsü repranga ayutsü aser iba ita nung alu achir iba jagi Luchii ta ajar.
B. Hopta ka nung anogo Tenet Ratet :
1. Amungnü (Sunday): Anogo troknü mazüngi pei mapa inyaka lir mungzükba anogo asüba agi Amungnü ta ajar.
2. Tentonü (Monday): Iba anogo akialu aser wadang balalai aotsü asoshi ratamataa, pezübelema aser tentotenraa dang ayamesoteter asüba agi Tentonü ta ajar.
3. Sangtennü (Tuesday): Maparen ajak tenzüka toker teinyakto wadang nung mulung sangwa-sangwa maparen ajak tenzüka aoba agi Sangtennü ta ajar.
4. Rasemnü (Wednesday): Maparen ajak nung bendenloka aser rasemraloka inyaksangshiba agi Rasemnü ta ajar.
5. Yangtepnü (Thursday): Maparen aser wadang balala nung purmedemer den yaritepa/küpzüktepa inyakba agi Yangtepnü ta ajar.
6. Rogonü (Friday): Iba anogo nung timtemer mesüra maparen balala nung tesüpur/merenemi alir angati yarisema inyaktsür ibajagi Rogonü ta ajar.
7. Küptoknü (Saturday): Purmedemeri asen koda mesüi alidang ajungba yariba asenia meyipa agütsüba anogo asüba agi Küptoknü ta ajar.