Assam police-i NDFB telungpur ka khaset

Guwahati, July 18 (TYO) : Kokrajhar district kübok Chautara tesem nung Assam police-i National Democratic Front of Boroland (NDFB) züngsem ka khaset.
Iba nisung ya NDFB deputy commander Sijoy ta jangjaogo aser taoba mapang pa apur nem sen lakh 5 senpet agütsütsü ta police-i osang metetdakja liasü.
“Sijoy-i anir telungpur telok kati Sonitpur nung taoba District additional superintendent of police Gulzar Hussain khaset aser police aika yirutsü” ta Assam police ketdangser kati ashi.
Telungpurtem aliba osang angazükba sülen January 28, 2014 nü asür Gulzar Hussain-i sepai telok ka anir telungpurtem alidak amaktsü atema ao. Parnoki iba tesep makdoker NDFB züngsem ka pur meyipa arudang Batachipur nung telungpurtemi sepaitem amak. Iba mapang Hussian den police nem osang sangoktsür na khaset.
Brihostibar nungi Sijoy ji ki ka longpanger liasü. Police-i pa dang pa sasa police ket nung agüjang ta ashi saka idangji pai police dak injang khaloktsü. Police-i meyiper injang khaloktsüdang pa khaset, ta police ketdangseri ashi.

You must be logged in to post a comment Login