Assam ya maneni Hindu timba aliba state ka asütsüla: BJP MP

Guwahati, October 06 (Agencies): Tawa tamangba yimsü balala indang nütsüng yongsük, census sayaba nung Assam nung Muslim nütsüng arenba atema tebilemtsü kaa Hombar nü BJP MP, Ramen Deka-i, linük asoshi Assam ya maneni Hindu timba aliba state ka asütsüla, ta ashi.
Pakistan aser Bangaladesh na nungi tamangba yimsü nung minority tem (Hindu) nunger state nung lidaktsütsü melatsüla ta Centre-i tuyuba sülen Assam nung lokti tentet aikati ibaji anema noktakba mapang ka nung BJP lenir Deka-i iba o jembiba ajanga ano mangatettep tasen ka adoktsü südi.
Centre tetuyuba pusema osangbenertem den jembidang Deka-i, linük ya tamangba yimsü nung ajemdaker bendanga lir, anungji kidanger linük ana nungi Hindu nungertem jenoktsü melatsüla, ta ashi.
“Lokapriya Gopinath Bordoloi ajanga, Assam ya tamalen East Pakistan nung adentsü aliba nokdangtet. Asenoki puti otsü mamatoktsüla. Tanübo linük ka nungi kati oa aliba ya alima ajak nung ataloker. Germany-i bendangertem atema arrtsü lapoktsüogo. Asen linük ya tamangba yimsü nung ajemdaker lemdang ta asenoki tangazükba angutsüla,” ta Deka-i ashi.
Deka-isa, “Tanübo state nütsüng shilem 34 Muslim nunger lir. Iba nungyagi shilem 3-4 bo Muslim lisopurtem lir. Assam ya maneni Hindu majority state ka asütsü atema asenoki inyaktsüla,” ta ashi.