Assembly election matongdang Naga yimten latettsüla: NLFNPI

Kohima, November 17 (TYO): Nagaland Legislators Forum on Naga Political Issue-i taruba state Assembly elections matongdang Naga yimten latettsüla ta bangzünga renem aser iba onük asoshi Prime Minister den Centre nung lennirtem dangi MLA teshimtet telok ka yoktsü telemtetba agi.
Brihostibar nikongdang Assembly conference hall nung NLFNPI indang senden amendang onük pungu telemtetba agi. Iba senden ya NLA Speaker Imtiwapang Aier menden ser amen.
Naga yimten tembanga latettsü atema Prime Minister Narendra Modi lenisüba nung mapa takok ngua inyaka aruba aser NSCN(IM) den Naga nationalist political groups 6 tashi yimjung olemtep nung adenba atema senden nung adenertemi pelaba metetdaktsü.
Ita ishika lir Nagaland Assembly Elections agitsü aliba dak rangloker, NLFNPI-i “telemtetba toktsür election dak ang temulung magütsütsü atema assembly elections magidangsa telemtetba ka agitsüla. Anungji, Chief Minister-i tekaratiba nung yimten telok ajak senden ka ayonga amentsüla” ta bangzünga renem.
Parnokisa, New Delhi-i oa Prime Minister aser Central lennirtem nem State Election 2018 matongdang Naga yimten tebilemtsü asoshi tekaratiba nung telemtetba ka agitsüla ta ashitsü atema yimsüsür teshimtet telok ka aotsü atema telemtetba agi.
Iba telemtetba nung NLA Speaker & Nagaland Legislators Forum Convener, Dr Imtiwapang Aier aser Chief Minister T R Zeliang nati sign asü.