Asür, Solanuo Badze, Keyake, P.Khel Kohima Village semzükogo

Kohima, Tsüklai 17 (TYO): Asür temoatsü nung Solanuo Badze, Keyake, P. Khel, Kohima Village tanü SDB, Parish Priest Christ King Church, Kohima Village, Rev. Fr. Peter Salwe-i meshiteta semzüktsüogo.
Asür, Solanuo Pienyii ya asür Rheichalie Pienyii, Peshkar kinüngtsü lir, shiba Naga Club nung mezüng Tir liasü.
Iba sentong nung jembidang Prasielie Pienyu-i, asür Rheichalie (Hisale) Pienyii-i pa kinüngtsü, asür Solanuo Pienyii tenüng nung 1929 küm Aenjeti 23 nü anisüngzükba tesemji yanglu, aser Tsüklai, 17, 2018 nü nüburtem atema semzüktsür, ta metetdaktsü.
Pai ashiba agi, asür Rheichalie Pienyii ji 1864 küm aso aser American Missionary-i amenokba Mission School nung Class VI tashi azüng, aser British nunger yimsüsüba mapang nung DC’s office nung Peshkar ama tenzük.
“Asür Rheichalie Pienyu ya 1918 küm tenetba Naga Club founding member liasü aser iba Club nung mezüngbuba Tir akum. Pa ya linük meimer ka, asalentong yanglur mongin ka aser Simon Commission nem Aenjeti 10, 1929 nü memorandum agutsüba nung sign asür rongnung ka liasü,” ta paisa metetdaktsü.
Rheichalie Pienyii ya 1944 küm asü.
Solanuo anisüngzükba tesemji yanglushia Tsüklai 17, 2018 nü asür, Rheichalie Pienyii’er tanabuba semchirtem Prasielie Pienyii, Keduokhrietuo Pienyii aser Visabeinyii Pienyii nungeri nüburtem atema lapoktsü.