Ato Kilonser Modi-i Arunachal semdangba China nungeri anem

Itanagar, Tsüklai 15 : Ato Kilonser Narendra Modi aser Arunachal Pradesh Chief Minister Pema Khandu na Itanagar nung Dorjee Khandu State Convention Centre lapokba sentong nung shilem agiba noksa nung angur.

Beijing, Tsüklai 15 (Agencies): China nunger-i Arunachal Pradesh ya South Tibet nung shilem ka lir ta khanga arudar aser Yangtepnü Ato Kilonser Narendra Modi-i Arunachal semdangba anemogo aser parnoki iba dak sendakba nung India anema longkak aittsü, ta shiogo.
“China-India arrtsü dak sendakba nung China nunger tamendakdak tejangja aser masetshi lir,” ta Modi-i tanü Arunachal Pradesh semdangba dak sendakba nung China nunger foreign ministry otongdar Geng Shuang-i ashi.
“China sorkari kodanga Arunachal Pradesh ta ajaba ya agizüka mali aser iba amala mangatettep aliba tesem ka India nunger leniri semdangba onoki ajang ajanga anemer,” ta Geng-i ashiba osang kakettem ajanga metetdaktsü.
“Onoki India nunger den iba dak sendakba nung ken o ashishiteptsü,” ta paisa ashi.
Geng-i ashiba agi, China aser India na arrtsü nung mangatettep aliba jung junga bentettsü asoshi tangatettep ka dangi aruogo aser telok anapronglai iba mangatettep ya takok tashi o agi angatettepa jembishinütsü asoshi inyaktepdar.
“China nungeri India nunger dang parnoki nangzükbatem benshitsü asoshi mepeshir aser Arrtsü nung mangatettep adoktsüsa kecha mapa minyaktsü asoshi akhanger,” ta Geng-i ashi.
Paisa maneni India nunger dang mapang talangka lir arrtsü dak sendakba nung tangatettep ka dangi arua jembishinütsü asoshi jenjang ka ajangteta aliba inyakyim ya meraksatsü asoshi mepishiogo.
India nunger lenir temi mapang shia Arunachal Pradeshi semdangba China nungeri anema arudar aser parnoki Arunachal ya parnok meyong ta nokdakba nenshia arudar.