Australia-i Hockey World League Semi-Final takok marok nguogo

Antwerp, June 06 (Agencies): Australia teloki goal 1-0 agi Belgium madak takok ngua Hockey World League Semi-Final takok marok yashi Deobar nü agizükogo.
Yashi asaya tembangtsü second 25 anünga aliba mapang tashi nung Australia asayartemi penalty corner ana tashi yangluteta goal agütsütsü merangaka tamakok anguba yong yashi takoker shimtsü asoshi penalty shootout asayatsüsa jenjang ajurua liasü.
Ajisüaka, Chirs Ciriello-i tatem nung par Australia telok asoshi takokba goal agütsüba yong par Australia-i yashi final asayaji koka gold medal agizüktsü maongka angu.
World No. 1 Australia asayartemi asaya tanabuba shilem nung penalty corner azüktsü maongka aiben ngua kanga meranga asaya saka par teloki yashi goal ka danga magütsüteti maongka ajunga amajok nung süidaktsü.
Belgium goalkeeper, Jeremy Gucassoff-ia kanga junga asayaba yong Australia teloki goal agütsütsüji kanga dang saka kümdaktsü.
Yashi asaya tenzüker minute 3 buba nung Australia-i goal ka agütsü aser kasaji umpire-ia mezüngbo agizük saka ball goalpost telungi aiba jakdang par striker, Blake Govers tetsüng nung kongshiba yong goal-ji magizüktsüsa aküm.
Asaya mezüngbuba shilem nunga Australia asayar, Tristan White-i yellow card temerenshi agizükba yong Belgium-i jenjang tajungba ngua asaya saka par telokia goal ka danga magütsüteti süidaktsü.
Asaya tanabuba shilem tetenzüklena Belgium striker Tom Boon-i goal agütsütsü maongka nguteta liasü saka pai zükoktsüba ball goalpost tezüleni ao goal takok ngua magütsütet.
Ano külen, semifinal nung tamakok ajuruba telok, Britain-i India madak goal 5-1 agi takok ngua tasembuba jenjang nguteta bronze medal agizükba osang jangjaogo.