Australia-i Qaraqosh jila yangluba nung yariteptsü

Brisbane, November 9 (Agencies): Iraq nung Khristan tamangertem ajema akümba atema süoki ia bilema Australia nungertemi Qaraqosh nung Khristantem yarir.
Middle East nung aliba Khristantem yarir NGO tenzüksang Benjamin Blanchard-i tan ita Australia semdangtsü aser ibaji Qaraqosh yanglushitsü atema sen $150,000 bendentsü teimla nung lir.
Blanchard-i lapoka aliba NGO ji ‘SOS Chretiens d’Orient’ lir aser pai November 26 nungi December 10 tsüngda Brisbane, New South Wales aser Victoria nung sentong balala nung adentsü.
Brisbane Catholic tsür Ora Duffley-i Blanchard pelaa agizüktsü. Taküm Easter matongdang lai SOS Chretiens d’Orient den yariteptsü nangzüka liasü.
SOS Chretiens d’Orient ya 2013 küm tentet aser nisung 1000 shi kati yaritepa arudar aser Australia nunger rongnung iba NGO den yariteplaji Duffley lir.
Australia nungeri tenla agütsüba atema SOS Chretiens d’Orient-i kanga pelar aser Iraq nung Khristan yimti tejentiba yanglushiba mapa nung yariteptsü atema Australia nunger ayongzüker, ta Duffley-i ashi.
“Australia nunger nem mapa ka lemzüktsübaji Qaraqosh yimti yanglutsüba lir. Australia-i $150,000 tenla agütsütsü atema onoki ayongzükogo” ta laisa shisem.
Qaraqosh ya Iraq nung Khristan yimti tulutiba lir aser ISIS kiralongrartemi makdok. Iba yimti nungi kibong aika pei ki toktsür jena ao aser aika taküm sama. Tatemsa October 2016 nung Iraq sepaitemi iba yimti kiralongrar ket nungi meyipa agi.
Qaraqosh toktsür jena arurtem aika Brisbane nung refugee status agir lir aser parnok tang Bracken Ridge parish nung jenoka lir.