Australia linük temzüng nung mangatettep adoka lir

Sydney, October 27 (Agencies): High Court ajanga Australia nunger indang parliament nung deputy prime minister densema züngsem pongu ‘dual citizen’ aliba mechi parliament nung züngsem asütsü metemsü, ta obendang agütsüba ajanga Ato Kelonser Israel-i aotsü aliba athi.
Deputy Prime Minister Barnaby Joyce ya House of Representatives nung member of parliament lir aser iba House nung Australia sorkar züngsem ka agi dang timba lir, saka ajia Hokulbarnü samaogo.
“Australia dak alaka ni tanga linük nunga citizen ka lir ta amangtsü asoshi küdak kuli kicha mali. Ni yangi dang aso,” ta Joyce-i osangbener dang ashi.
Pai New Zealand indang citizenship toktsüogo aser Joyce ya joko December 2 by-election nung pa tang shimteta aliba constituency nung tokteptsü.
Joyce metemsü, ta obendang agütsüba ajanga pai minister ka ama telemteba agibatem nunga nüburtemi tasüngdangba arur.
Joyce-i telemtetba agibatem nung nüburtemi tasüngdangba agütsüra iba indang ken o benoka jembitsüsa akümtsü, ta constitutional lawyer Anne Twomey-i ashi.
“Item telemtetba ya ajanga pa mepelatsü akok,” ta Twomey-i shisem.
Tanga linük nung temeden alir mesüra tanga linük nung citizen alir kati parliament nung züngsem mükemtettsü, ta Australia indang linük temzüng nung shia lir.
Tang disqualify süja aliba MP tem ya timba par tsüraburtem ya Australia nunger saka tanga linük nung asoba lir, mesüra Australia nung saka bendanger tsüraburi asoba tem lir.
Parliament nung züngsem akümtsü asoshi toktepba mapang parnok dual citizen aliba ya memeteti liasü, ta parnok pezü-i ashi. Saka iba ama mashimemetetba ya temzüngi memetet, ta High Court nung obendanger temi ashi.
Ato Kelonser Malcolm Turnbull ya Honibarnü Israel-i aotsü liasü. Aser linük temzüng nung aliba ama pa linük nung maliba mapang pa indang deputy ajanga maparen ajak ketdang süa inyaktsü liasü.
Saka court ajanga iba telemtetba agiba sülen pa Israel-i aotsü aliba thiogo, ta pa indang odongtar kati osangbener dang ashi.
Parliament nung tang disqualify süa aliba senator pezü ya parnok party nung züngsem temi melentsü.