Australian Open nung Nadal tasembuba round-i iogo

Melbourne, Aenjeti 17 (Agencies): Rafael Nadal-i Rasemnü Australian Open nung Leonardo Mayer madak takok nguteta tasembuba round tongtetogo.
Rod Laver arena nung asayaba mapang, Spain nunger World No.1 Nadal-i 6-3, 6-4, 7-6 (7/4) agi, 52buba jenjang nung alisang Argentina nunger Leonardo Mayer madak takok angü.
Nadal tasembuba round nung Bosnia-Herzegovina nunger Damir Dzumhur den asayatsü atema jangjaogo.
“Leonardo ya asayar tajung ka lir aser pai ball kanga tashi agi zükteter, koba nenoki taoba asaya nung ngur alitsü.
‘Tie-break’ nung ni shots karbo kanga junga azüktsa aküm. Pa ya kaganga dang tetokteper tajang ka lir. Tennis asaya nung mapanga tatsüka masayai lir, Australian Open nung tasembuba round tongtetba atema ni kanga pelar,” ta Nadal-i shia liasü.
Nadal World No.1 jenjang nung alibaji Federer nem memenepdaktsütsü atema tang tasayadak Australian Open nung quarter-finals tongtettsü nüngdaker ajiasü nung dang pa temaba jenjang nung masetshi-i litettsü.
Kasa mapang nung tetsür kija asaya nung arishi küm 15 tain Ukraine tsür Marta Kostyuk-i Australian Open tanabuba round nung Australia tsür Olivia Rogowska 6-3, 7-5 agi kokogo. Lai yaküm junior championship akokba ajanga qualifiers atema wildcard ngua liasü. Iba takok ajanga la Swiss tsür Martina Hingis-i 1996 küm Australian Open tasembuba round tongteba sülen la iba asayamung nung tesembuba round tongteter rongnung tanutsüila kümogo. Maneni Mirjana Lucic-Baroni sülenbo la tongtibang asayamung ka nung shilem agir tanutsütila kümogo.