Ayodhya nung Ram tekülem ki yanglutsü atema Muslim nungeri mashishir: Sri Sri

Ayodhya (Uttar Pradesh), November 16 (Agencies): Brihostibarnü The Art of Living tentetsang, Sri Sri Ravi Shankar-i Ayodhya nung Ram tekülem ki yanglutsü atema Muslim nunger aikati ashishia mali, ta metetdaktsü.
Sri Sri-i, “Nisung karibo iba nungji ai-aura makatsüa akok ta ni meteta lir, ajisüaka Ram tekülemi ki yanglutsü atema Muslim nunger aikati mashishir,” ta ashi.
Paisa, mapa aika tamakoktsü ta bilemer, ajisüaka asen nüburtem, lanurtem aser tamangba yimsü anaprong (Muslim-Hindu) nungi lenirtemi ibaji takoktsü ka kümdaktsütsü, ta ashi.
Brihostibarnü pai Ayodhya nung Ram Mandir-Babri Masjid mangatettep ken o nung stakeholders ajak dang iba ken o latettsü atema senden nung ayongzüka liasü. Ayodhya nung Babri Masjid raksatsüba ken o December 5 nü Supreme Court-i angadangtsü lia tanü pai Ayodhya semdang.
Paisa, ken o jembishinübo tenzükogo ajisüaka telemtetba dangi arutsü atema mapang agitsü, ta ashi.
“Tensa junga lir. Nüburtemi iba mangatettep ken o latetner. Ibaji temela masütsü. Ni ajak den jembitsü. Telatetba ka dangi arutsü atema ano mapang lir,” ta tanep pai jembia liasü.
Pai Ayodhya semdangbaji Bharatiya Janata Party (BJP) lenirtemi pelaa agizük, ajisüaka opposition party lenirtemibo pa aitsüogo.
Bodhbarnü Lucknow nung Sri Sri-i Uttar Pradesh Chief Minister, Yogi Adityanath-a ajurua senden ka mena liasü.