B.B. King asübaji miim ajanga masü: Coroner John Fudenberg

July 14, 2015: Nüngtugu kentener B.B. King asübaji miim ajanga masü ta Hombar nü Nevada nung corner kati metetdaktsüogo.
Nüngtugu blues kentener B.B King taküm May ita nung asüba sülen kobi melii par jala anati tebu indang manager aser personal assistant nati miim ajanga pa südaktsü ta tai tonglokja liasü.
B.B King küm ka dak tema shiranga liasü aser arishi küm 89 nung Las Vegas nung aliba hospital ka nung asü.
CNN osang den jembiba mapang coroner-i, B.B King tashitak balala ajanga shiranga asü, ta ashi. Item tashitak rongnung artery atherosclerosis, type 2 diabetes, hypertension, coronary heart disease aser cerebro vascular disease densema lir.
“Alzheimer tashitak den tanga tashitaktem ajanga pa asü ta onoki bushitetogo,” ta coroner John Fudenberg-i CNN dang ashi.
B.B King chirnur 15 liasü aser parnok rongnung tang parnok 11 taküm lir.
Par chir rongnung jala ana- Patty King aser Karen Williams nati tebuji miim agidakja südaktsü ta tai tonglokja liasü.
“Kübu nem miim mozü agidaktsüogo ta ni bilemer aser ibaji ajanga pa anojungi asü. Kübuji tepset südi ta ni bilemer,” ta jala anati affidavit balala ajanga ashi.
Tangbo B.B King asüba ken o bushisüngdangba maparen ajak tembangogo aser bushisüngdang tasen kecha tuyua mali.