B-Town celebrity temi Akshay Kumar den tasoba anogo salem lemsateper

Mumbai, September 9 (Agencies) : Honibarnü Bollywood celebrity tem, Hrithik Roshan, Kabir Bedi, Farhan Akhtar aser Taapsee Pannu nunger den ano actor tem aser tangar aikati National Award angusang, actor Akshay Kumar den pa küm 50 ajungba nüngtem nung pa asoba tepela salem lemsatepogo.
Bollywood superstar Akshay Kumar-ia pa asoba anogo tenüng nung pa indang fans atema pai shilem agiba film koba ano mesaya lir iba film indang poster sayatsü.
“Mepet ajak nung silver lining lir ajisüaka nenok temeim ajanga kü mepetbo gold lining keta kümogo. Ni golden küm ajungba mapang ni shilem agiba ‘Gold’ film, koba kü mulung den kanga anasatepa lir, iba indang poster nenok nem bentsür arur,” ta Akshay-i Twitter nung iba poster dena tweet asü.
Tanü arishi küm 50 ajungsa actor Akshay Kumar ya India nung comedy actor tajungtibatem rongnung ka lir, ta nüngtugu noksa tangoker Dabboo Ratnani-i ashi.
Akshay ya tang tenzüktsü aliba reality show, “The Great Indian Laughter Challenge” nung Super Judge asütsü shima lir. Iba sentong indang episode tem rongnung ka nung Ratnani-ia shilem agirtem, mentors aser Akshay nunger indang video tangoktsü.
“Ni Star TV show ka nung shilem agitsü maongka anguba atema ni kanga pelar. Ano ni talila pelabaji kü tembar Akshay Kumar aliba ajanga lir. Pa ya India nung aliba comedy actor tajungtem rongnung ka lir ta nibo bilemer. Pai comedy aiba mapangji kanga tapet nung aier,” ta ano nüngtugu actor tem indang noksa inoka küm shia calendar adoksang, Ratnani-i sangdong ka ajanga ashi.
Khen mapang ka nung action film nung maneni shilem agisang, Akshay-i pa indang comedy sempet tajungji “Hera Pheri”, “Garam Masala” aser “Housefull” film tem nung sayua lir.
Pa tasoba anogo nung pa tangi tweet asürtemji Hrithik Roshan, Kabir Bedi, Farhan Akhtar, Riteish Deshmukh, Taapsee Pannu, Dia Mirza, Suniel Shetty, Arjun Rampal, Nikkhil Advani, Ritesh Sidhwani, Sajid Khan, Raj Kundra, Milap Zaveri, Maniesh Paul aser Sophie Choudry nunger den ano tangar aika lir.
2015 küm pa Forbes indang alima nung sen timtiba aateter actor tem tarensen 9buba nung liasü. Pa 2001 küm Rajesh Khanna aser Dimple Kapadia na jala producer-author aser entrepreneur Twinkle Khanna den kibong aküm.
Pai küm 25 dak tema acting süa aruba mapang Hindi film noklang aika nung shilem agia lir aser item rongnung “Dhadkan”, “Namastey London”, “Bhool Bhulaiyaa”, “Hera Pheri”, “Mujhse Shaadi Karogi”, “Garam Masala”, “Bhagam Bhag”, “Singh Is Kinng”, “Housefull”, “Rowdy Rathore”, “OMG”, “Special 26”, “Holiday”, “Gabbar Is Back”, “Airlift”, “Rustom”, “Jolly LLB 2” aser “Toilet: Ek Prem Katha” film tema dena lir.