Backdoor ajanga shimertem regularise masütsüla: ACAUT Nagaland

Dimapur, November 11 (TYO): November 11, 2017 nü Chief Minister indang office nung Cabinet senden ka amendang backdoor ajanga shimokba mapatem regularise asütsü atema tebilemba benoka lemsatep ta osang angazüker aser iba ya shitakba süra kanga dang taoksatsüka lir, ta ACAUT Nagaland-i ashi.
High Court, Kohima Bench-i 4.8.2008 aser 11.8.2016 anogo agütsüba Office Memorandum tem sota lir. Item OM nung küm asem lir külen sorkari backdoor appointments ajak regularise asütsü shia lir. Tanü Cabinet senden amenba osang tejangji ano mangazük lir saka Cabinet-i regularization maparen tenzükra, ibaji okadak anema inyakba mapa ka ta aitsütsü, ta parnokisa shisem.
ACAUT aser PSAN nati backdoor appointments anema ken o benokba nung ajemdaker High Court-i OM anaji sota ayu. Anungji, Cabinet memo nung backdoor ajanga shimertem regularise asütsü atema züluoka aliba atema Cabinet-i tangsatang jangjashitsütsü akhanger, ta ACAUT-isa ashi.
Cabinet-i backdoor ajanga shimertemji regularise sütsür lira, ibaji Naga nunger lanur meyirjang aika indang tarutsü raksatsüba mapa ka asütsü aser iba tebilemtsüji Chief Minister aser par cabinet züngsemtem abentsü, ta parnokisa shisem.

You must be logged in to post a comment Login