Badminton asaya nung India kanga renlokogo: Lin Dan

Mumbai, November 4 (Agencies): Olympic anaben tashi koker alisang Lin Dan-i ashiba agi, küm ishika nung India nung badminton asayaba kanga renlokogo, saka taruba küm tem nung China nungeri maneni iba asaya amokbanger asayatsü.
“Küm tem tsüngda nung India nunger asayar Saina aser Srikanth nunger nguogo aser parnok kangajunga renlokogo. Maneni lanurtema kanga junga asayadar,” ta Dan-i ashi.
“China nung tanüasüng ka iba asaya kanga temolung agüja asayadar. High school tem nung parnok telok balala kümteta lir. Yakta China nungeri taoba mapang nung ama iba asaya amokbanger asayatsü,” ta China nunger badminton asayaba indang asüngdang dang pai langzü.
Teburtem kicha asaya njung variety tali lir asü, ta asüngdang dang, Dan-i yamai langzü: “Taoba mapang tem nunga variety liasü saka tanga kanga renloka odar.”
Denmark nunger nüngtugu asayar Peter Gade-i, India badminton asaya nung kanga renloka aoba ya, linük nung asayaba ren melenshiyonga aoba ajanga lir, ta ashi.
“Mezüngbuba nung asenoki India nung badminton kanga nüngtugu küma aoba nguogo aser iba ya taoba küm tem nung asayartem; Saina Nehwal, (PV) Sindhu aser (Kidambi) Srikanth nungeri kanga junga asayaba ajanga lir. Asaya ka nung celebrities alitsü nüngdaker, shirnoki temaba jenjang tonga asayateter,” ta Gade-i ashi.
Maneni Kidambi Srikanth-i taküm Super Series titles pezü tashi koktetba sülen India nung badminton asayaba ren kanga melenshiogo.