BAN-i PMEGP scheme atema ochishia inyaktsü akhanger

Dimapur, July 7 (TYO) : Sorkari teyari balala agütsüba atema inyakba mapa nung ADHAAR card mali yonga kecha mali ta okadaki obendang agüja liaka, Directorate of Industries & Commerce aser KVIC department nungertemi PMEGP scheme atema ADHAAR card alitsüla ta ashibaji tim masü ta Business Association of Nagas (BAN)-i sangdong ka ajanga metetdaktsüogo.
Industries & commerce aser KVIC department nungertemi scheme atema entrepreneur chichiba nungertem ang shimtsüla, ta BAN-isa metetdaktsüogo.
BAN-i aiben bank ketdangsertem den ajurutepa sensaksemdang PMEGP scheme angurtemi bank nem sen meyipa magütsüba khuret lemsatepogo. PMEGP scheme atema nisungtem shimba rongnung parnok teimbaka yimten lennirtem aser sorkar ketdangsertemi tashiyim amshia shimdaktsür aser item nisungtem jagi bank nem tagütsütsü tim meyipa magütsür, ta BAN sangdong nungsa shia lir.
PMEGP scheme agirtemi bank nem sen meyipa magütsüba ajanga chichiba Naga entrepreneur tem bank nungi teyari agitsü maongka mangur, ta parnokisa shisem.
July 6, 2015 nü PMEGP form peria malemba osang angashiogo aser district industries aser commerce, DIC office nungertem nung ghonda ka tsüngda form temadokba ajanga entrepreneur aika jashidaktsüogo. Shitakba agibo chichiba entrepreneur ajak nem form angati agütsütsüla aser parnoki agütsüba nungi mapatong tajungtem shimtsüla sernung KVIC-i kechi tasa atonga inyaker ta BAN-i rata bilemer.
PMEGP scheme atema selection committee-i entrepreneur tem ochishia shimtsü asoshi takhangba agütsür aser PMEGP scheme kübok shimba candidate tem BAN-i mita reprangtsü. Anungji department-i tangartemi ashiba mangai ochishia dang tetemjen nübotem shimtsü ayongzüker, ta Media cell BAN sangdong nungsa shia lir.

You must be logged in to post a comment Login