Baptiba Ka – Mathi 3:1-17

“Shibai amanga baptir, pa kümzüktsü.” Mark 16:6
Tzü nung baptibaji nisung mesüra arogoi ngutetba masü. Tebu Tsüngremi ibai tentet (Yn. 1:33). Tsüngrem chiri ozüng agütsü (Mt. 28:19). Tsüngrem Tanela Temeshi ajanga tamangertem baptitsütsü sayu (T.M. 2:38). Mezüng arogoi ibai maneni amshia aru (T.M. 2:41; 8:12; 9:18; 10:47). Baptitsü menüngdakbaji Yisu dang liasü. Yohan Baptitsübai pa mebaptitsütsü songtem. Saka Yisui ibaji temeshiba atalokdaktsütsü inyakang ta ashi (Mathi 3:15).
Tanela Temeshiba agizükba jagi baptiba melentsü makok. Kornelius military officeri mapa tajung inyakba aser sarasademba Tsüngremi agizük. Pa Tanela Temeshi nunga bapti saka Tenyar Peteri pa baptitsüla ta ozüng agütsü (T.M. 10:1-2, 46, 48).
Tzü nung baptibaji temulung meyipba tema nung kuli asüba lir. Ibai asenok asüba, aremba aser Kibuba Yisu Khrista den shia aruba ayak lir (Rom 6:3-6). Baptiba temaitsüji, “Ni temenen nung asü Khrista den arem aser Tsüngrem asoshi taküm tasen nung shia aru” ta asenoki ashiba kuli lir. Baptibaji walok-watemba ka ama masü (1 Peter 3:21). Baptiba Kasem dang asenoki tenangzükba agiba lir, “Tang nungi Nü meyong lir!” ta nangzükba lir. Baptiba nungi tasen ka tenzüker. Ananiai Paul dang ashi, “Noktakang aser baptiang, aser menen shidokjang, aser Kibuba tenüng nung jaang” (T.M. 22:16).
Khrista pei Kümtetdakba ta agizükli baptitsüla. Pentecost anogo nung Yihuda nung nisung 3000i Khrista agizük aser iba anogo nungjisa bapti (T.M. 2:41). Filipian tepuoker kibur pai Khrista agizükba aonungjisa baptia liasü (T.M 16:33). Baptitsübaji Tsüngremi melaba lir. Ibai tesongtem (Lk. 7:30). Tashi angatsü menubaji tashi mangaba den kasa lir.
Baptiba kaji Kibuba ka dak tamang ka ayubaji asenok taküm kuli lir (Ef. 4:5).
Kibuba Yisu, Nai melaba ozüng nung ni tashi angaa alitsü aser inyaktsü yariang. Amen.