Ben-i Batman film tasenba direct asütsü, zülutsü aser shilema agitsü

Ben Affleck

July 10, 2015: Hollywood nung actor, Ben Affleck-i Zack Snyder film ‘Dawn of Justice’ nung shilem agiba sülen Batman film tasenba direct asütsü, yaritepa zülutsü aser film nung shilema agitsü.

Batman otsü kaket sapurtemi: “Tenüng asangtsü, lutsütsü mesüra nai koma bilemer aji ashitsü renema liang – Ben Affleck-i Batman film tasenba direct asütsü aser nisüng tamajunger den rarar ama shilema agitsü,” ta ashi.

Deadline.com ajanga ashiba agi, iba film ya Ben Affleck-i DC Comics nung tekolak Geoff Johns den lokteper zülutsü, aser iba tezülubaji tan mei tashi nungbo renemadoktsü. Zack Snyder-i direct asüba ‘Batman v Superman’ film-a taruba küm March ita nungi sayu tenzüktsü. Ajisüaka Ben Affleck-i tan zülutsü aliba Batman film tasenba ya kodang sayatsü ano mejangjateti lir.

Ben-i tanga mapanga film direct süa aruogo aser pai 2010 küm yangluba ‘The Town’ film aser iba sülen 2012 nung ‘Argo’ film tem ajanga pa kanga tetushi ngua liasü. Argo film ya 2013 küm Oscar sentong nung film nung noksa tajungtiba tenüng ngua liasü. Anungji tan Batman tasenba nung shilem agitsü alisang ya film asoshi kangasa tapet asütsü.

Warner Bros ajanga Affleck-i Batman fim tasenba direct süa zülutsü aser shilema agitsü, ta metetdaktsü saka Honibar nü San Diego nung Comic-Con sentong nung pa ‘Batman v Superman’ ajungkettsü asoshi ang arua liasü.

‘Batman ya America nungeri Hamlet otsü nung ajemdaker yangluba lir aser nübur aikati otsü balala ajanga Batman jilo aibaji ajaki agizükteter,” ta Ben-i ashi.

You must be logged in to post a comment Login