Bendangertem dak ita shia sen lakh 13 indoker

Guwahati, Tsüklai 15 (Agencies): Assam nung bendangertem ajanga mapangshia timtem balala agütsüba dang masü saka state senpong nunga kongshiogo.
1985 küm Assam Accord sign asüba sülen nungi bendanger parnok 90,206 jangjatsü asoshi state-i sen crore 133.7 indokogo aser maneni detention camp trok nung Bangladesh nunger ozüng alema kuli kaket tejangja makai arur alir parnok 885 anepalutsü asoshi ita shia sen lakh 13 indoker, ta Assembly statistics tabled ajanga metetdaktsü.
Ketdangsertemi ashiba agi, National Register of Citizens, 1951 update asüba nung sen crore 858 indokogo aser iba inyakyim ya bendanger tebilemtsü bentettsüba asoshi inyakba maparen ka lir.
Sorkari Assembly nung ashiba agi, Assam Accord sign asüba sülen state nung bendanger 90,206 aliba putetogo aser okadak ajanga parnok 29,783 ozüng alema aruba tem ta kuli agütsüba sülen parnok pei linüki meyipa yokogo. Iba accord ya Centre sorkar aser 1979 o 1985 tsüngda nung anti-foreigner movement aniba loktitem tsüngda tezüngzüktepba yangluba ka lir.
Official data ajanga ashiba agi, Jorhat, Silchar, Tezpur, Dibrugarh, Goalpara aser Kokrajhar jails nung Bangladesh nunger parnok 885 puoka alirtem chiyongtsü, süoshi aser medical dak sendakba nung sorkari ita shia sen13,03,079 indoker. Item ozüng alema state-i aita alirtem ya parnok jail term tembangba sülen mindoktsü mesera deport sütsütsü.
“Detention camps ajak nung puoka alirtem nem breakfast atema süngo, roti aser jaggery agütsür aser lunch o dinner nung chi, dal aser aonsotsü balala agütsür. Ango, shi mesera entsü hopta nung anaben ben agütsür. Mamatzü, amtsük amala tanurtem aser shirangertem nem Doctor tetuyuba nung agütsür. Maneni tanur bena aliba tetsürtem aser kinü tanur nem mama yongdakja aliba tetsütem nem chiyongtsü tajung chidaktsür,” ta kasa sangdong ajanga metetdaktsü.
Detention camps tem nung puoka alir parnok 885 rongnungi parnok 265 Hindu nunger lir, Muslim nunger 618 aser Khristan ana lir.
Maneni bendanger tem state nung ozüng alema arua aliba putettsü asoshi tribunals 100 amenoka aliba nung sorkari sen aika indokdar.