Bendangertemi Hafiz tepsettsü meranger

Lahore, November 11 (Agencies): Pakistan ketdangsertemi Punjab home department dang Hafiz Saeed kanga junga anüktsü atema shidi ka züluogo.
Saeed ya Mumbai amaktsü atema tasa atongsang lir aser Pakistan ketdangsertemi ashiba agi “foreign intelligence agency” kati pa tepsettsü atema sentong renema lir.
Bendanger spy agency jagi ozüngi nokdanga aliba telok nung züngsem ana nem Saeed tepsettsü atema Rs. 80 million agütsüogo, ta National Counter Terrorism Authority-i ashi.
Parnoki Punjab home department dang Jamat-ud-Dawah (JuD) tekolak Saeed nem security takang agütsütsü atema ashi.
Taküm January 30 nungi Saeed ya Anti-Terrorism Act 1997 kübok tai tonglokja Lahore nung house arrest nung yua lir.
Home department pa anogo 30 nü (taküm November 26) tashi public safety law kübok house arrest nung ayutsü atema mapang apulokja lir.
“Saeed chiok nungbo tensa mejungi akümtsü atema Saeed-i mapa inyaktsü akok” ta department-i metetdaktsü.
June 2014 nungi United States-ibo JuD telok ya bendanger kiralongrar telok ka ta züngoka lir.
JuD tekolak Saeed apur mesüra tepseter nem USD 10 million senpet agütsütsü ta US-i sangdonga lir.