Bhushan-i CJI anema ken o agutsü

New Delhi, Aenjeti 17 (Agencies): Supreme Court lawyer, Prashant Bhushan-i medical college ochimashi ken o nung pai Chief Justice of India (CJI), Dipak Misra anema ken o agütsü aser Supreme Court nung tawa osangbenertem senden ayonger judge pezü densema senior judge pongu dang SC nung mangatettep onük bushisüngdangtsü mepishiogo, ta metetdaktsü.
Judicial Accountability and Reforms Campaign Convenor ka ama, Bhushan-i Justice Misra anema bushisüngdangtsüla ta shia pai, “CJI-i inyakyim aika nung aibelenogo, aser ibaji SC nung judge asem mesüra pongui akumba committee kati bushisüngdangtsüla,” ta takhangba agutsü.
Bhushan-i Chief Justice anema onük pezü agütsü aser itemji Justices J. Chelameswar, Ranjan Gogoi, Madan B. Lokur, Kurian Joseph aser Justice AK Sikri nunger nem agütsü.
“Prasad Education Trust ken o nung atangji tebushitetbatem aser mezüng bushisüngdang ajanga CJI Misra-a iba nungji densema alitsü südi ta sayur, aser ibaji junga bushisüngdangtsü nüngdak,” ta Bhushan-i ashi.
Bhushan-i ken o agütsüba nungji Orrisa High Court nung mapa nungi anisüngzüker alisang judge, IM Quddusi (Central Bureau of Investigation-i apusang)-i Biswanath Agarwala aser Prasad Educaion Trust nungi BP Yadav nunger tsüngda phone ajanga jembiba ‘tape’ densema agütsü.
Pai agütsüba onük nungjisa, Prasad Education Trust ken o nung Allahabad High Court nungi Justice Narayan Shukla anema ken o benoktsü atema Justice Misra-i CBI nem temelaba magütsüba atema asüngdanga lir.
Bhushan-i benokba tanabuba onük nungji Justice Misra-i tim masüba nung tashi alia amshiba indang shia lir.
Supreme Court advocate-isa, “Justice Misra-i lawyer ka ama affidavit tai amshia Odisha nung fodder farm atema ali agi,” ta metetdaktsü.
Ajisüaka 1985 küm local Magistrate kati ali aliba tezüngzüktepji thinentsü, saka Justice Misra-i iba liji pa Supreme Court nung shimba sülen 2012 küm nungang meyipa agütsü.
“Judiciary tenüng iba dang nungi taliba memenüktsü atema ibaji tekaratiba nung bushisüngdangtsüla,” ta pai ashi.