Bihar nung bomb apokba ken o nung JD(U) MLA ka apu

Ara (Bihar), July 11 (Agencies): Taküm January ita nung bomb apokba ken o dak sentakba nung tanü JD(U) MLA Sunil Pandey puogo.

Bhojpur district, Tarari nungi MLA Pandey-i Police Superintendent ajurutsü asoshi office-i aoba mapang pa apu.

MLA apuba osang jangjaba sülen SP Navin Chand Jha-i, MLA Pandey ji Town police station-i anir ogo, ta ashi.

Ara court -i bomb apokba ken o nung tongti aibelensang Lambu Sharma-i tawa Delhi police dang, judicial ket nungi ajentsü asoshi MLA Pandey-i pa yarisem ta ashiba sülen Pandey puogo, ta SP-i ashi.

Taküm January 23 nü Ara court-i anir aoba mapang Lambu Sharma den Akhilesh Upadhyaya na jena ao iba sülen bomb ka poka liasü. Iba lendong nung nisung ana pokset aser nisung 20 dak tema yiru.

Kobi melii Upadhyaya jibo apu saka Sharma jibo June 24 nü ang Bihar Police aser Delhi Police na senteper Delhi nung apu.

July 1 nü Additional Director General of Police (Headquarters) Sunil Kumar-i ashiba agi, Lambu-i Delhi Police dang Uttar Pradesh nung auer tetsüdi nungi yimtenren lenir akümsang Mau constituency MLA Mukhtar Ansari tepsettsü asoshi Pandey-i pa nem sen lakh 50 agütsü, ta ashi.

You must be logged in to post a comment Login