BJP-i Meghalaya police tekolakba agientsü akhanger

Shillong, Tsüklai 16 (Agencies): Bharatiya Janata Party (BJP) ajanga Meghalaya indang Director General of Police, Swaraj Bir Singh tekeraba nung mapa nungi anentsütsü asoshi akhanger.
Pai Chief Minister Mukul Sangma atema nübuyimtsü, ta aitsür.
Election tim-i agitettsü mechi BJP-i Election Commission dang pa mapa nungi anentsütsü asüngdangogo.
Chief Election Commissioner, Om Prakash Rawat dangi petition ka züluba nung, Singh den police lenir kar densema yimjak nung Congress atema nübuyima jaja, ta BJP-i shia lir.
Meghalaya nung Tsüklai 27 nü election agitsü asoshi renema aliba reprangshitsü asoshi Rawat ya Meghalaya nung lir.
Sangma ya Garo Hill nungi lir aser iba tesem nungi tokteper, aser iba tesem nung election mapang tasa tamajung agi takok angutsü mechi telungpur shia arudaktsü, ta BJP-i Mukul Sangma aitsür aser iba tesemi Central armed police force (CAPF) yoka aliba ya police observer den tongtepratep asütsüla, ta akhanger.
Iba tesem nung kin o kin tsüngta tesempatep aser tsüchitep adoktaktsütsüsa o jembir, koba ajanga Representation of Peoples Act nung agüja aliba temzüng alemer aser tsükchitep adokdaktsütsüsa inyakertem dak ozüng agi melaba ama temerenshi agütsütsüla, ta BJP-isa akhanger.