BJP-i nübur ajak atema inyaktsü: BJP Candidate, Tovihoto Ayemi

Dimapur, Tsüklai 17, (TYO): BJP-i parnok yimyim “Together with all Development for all” nung ajemdaker state nung par candidate toktepba tesemtem nung nüboyima senzüdar, aser iba dak sendakba nung tanü nikongdang Children’s Park, Supply Colony Ward no 9 nung BJP 1 Dimapur -I Candidate, Tovihoto Ayemi-i Forest Colony, Nepali Basti aser Bishop’s House nüburtem den jembia liasü, ta BJYM Dimapur District Tir, Khekishe Aye-i sangdong ka nung metetdaktsü.
Tovihoto-i, state nung kanga akhüm takettiba constituency ji 1 Dimapur – I Constituency lir, aser iba constituency nung akhüm takettiba Ward ji Ward no 9 lir, kechiyong iba ya yimti tiyongtsü tesem ka nung lir ta metetdaktsü.
Pai ashiba agi, national party ka ama BJP-i ochishiba sorkar ka amenoktsü aser junga yimsüsütsü, loktiliba temeden, accountability, lanurtem atema mapa aser tetsürtem nem tashi agutsütsü atema inyaker, ta ashi.
“State nung kodang BJP sorkar arudir tajung aika ataloktsü,” ta paisa ashi.
Taoba mapang NPF MLA-isa, pai BJP nung adensü telemtetba agibaji telemtetba shidak ka agiogo, kechiyong iba party-i nübur ajak atema inyaktsü, ta shia nüburtem dang pa nem vote agüjang ta mepishia liasü.
Kasa sentong nung taoba DMC Councillor aser BJP 1 Dimapur – I, Campaign Director, Hokuto Zhimo, senior BJP lenirtem- Rosy Yanthan aser Medom, taoba DMC Candidate, Vikali Zhimo, Supply Colony nung tebu teditem aser lenirtemi jembia liasü.