BJP Nagaland-i Booth-level training tanabuba shilem tenzük

Dimapur, Aenjeti 12 (TYO): Aenjeti 12, 2018 nü Bharatiya Janata Party (BJP) Nagaland Unit-i Booth-level workers training/meeting tanabuba shilem Mon district kübok Mandals ana- Mon Town 46 A/C aser Phomching 44 A/C nung tenzükogo; BJP Booth Level Training Convener, K.James Vizo, State BJP Secretary, Lima Onen Chang aser BJP Media cell co-convenor, Yanghose Sangtam nunger leniba nung iba training tenzük, ta tanü BJP Nagaland Media Cell sangdong ajanga metetdaktsü.
Mon jila nung Booth-level workers training nung adenertemji 280 liasü, aser local committee aser Mandal workers densemabo meyi ka dak tema asütsü.
Ajisüaka Phomching nungbo Booth level workers ji 380 liasü. Sendenji district president, Nyawang Konyak leniba nung agi, Phomching Town Baptist Church nungi leniri sarasadem, BJP 44A/C Phomching Tir, Chingjon Mandal-i lokti pelaa agizük aser Nokba-i tepela o jembia liasü.
Mon Town nung ayongba sendena district president leniba nung agi, O. Kamzei Konyak-i sarasadem, 46 A/C Mandal Mon vice president, Lemhu Konyak-i lokti pelaa agizük aser BJP Mon District vice president, Chinglei Konyak-i tepela o jembia liasü.
Senden nung jembidang K. James Vizo-i, Party telung sasep nung democracy inyakyim aliba yimtenren party ji BJP kija lir, tanga party tembo kibong aser senmangba nung amenoka lir, aser tangatetba tejangja mali, ta ashi.
Pai ashiba agi, Ato kilonser, Narendra Modi-i yamai jembiogo, “Tamangba yimsü ajak aser lokti ajak kasa temeten lir, aser parnok kümzüka alitsüji kü teinyaktsü lir. Kin mesüra tamangba yimsü nung ajemdaker bendanga amshibaji ozü party-i magizüktettsü,” ta metetdaktsü.
Lima Chang-i, BJP-i terenlok atema inyaker, ajisüaka tamangba yimsü dak sendaka kecha meinyaker, saka secularism tangatetba nung inyaker, ta ashi.
Yanghose Sangtam-i Modi sorkari tajemzük tia nung alir aser sensakertem dak rangloker mapatong/schemes balala benoka inyakba indang metetdaktsü.
Mon town nung ayongba sentong nung Vice president, Er Cheong Konyak-ia jembia liasü.
Aenjeti 13, 2018 nü party-i maneni 43 A/C Tapi Mandal aser 41 A/C Tizit Mandal na nung Booth-level Training ayonga akatsü, ta kasa sangdong nung shia lir.