BJP-NDPP teloktepi taruba sorkar akümtsü: Johnny G. Rengma

Kohima, Tsüklai 13 (TYO): BJP aser Nationalist Democratic Progressive Party (NDPP)-i takok tulu ngua Nagaland nung taruba sorkarji akümtsü ta BJP National Executive Member, Johnny G Rengma-i ashi.
“Neiphiu Rio-i chief minister bener BJP aser NDPP teloktepi state sorkar ketdangsüa aotsü” ta tanü pai osangbener senden ka nung ashi.
BJP-i election masü Naga yimten latettsü tangatetba nung noktaka lir. Naga yimten tebilemtsü ya ulura aser Naga nunger asoshi telemtetba ka agiba nung sorkar ka kümteta alitsüla ta Naga nungertemi angatettsü imlar, ta Johnny G Rengma-isa metetdaktsü.
“Election tembangba sülen political party temi masü saka sorkari dang Naga nunger asoshi telemtetba agitsü. Anungji nübortemi mezüngji linük, tanabubaji party aser tesübubaji pei nija indang taginüba ta angatettsü mepishir” ta paisa shisem.
Taoba mapang Naga People’s Front (NPF) den teloktep aliba kechiba pila ta osangbeneri asüngdangdang, “Onoki election atema NDPP den menden lemsatsü angatettep saka onoki taoba mapang teloktep aliba nungi mepila. NDPP ya political party tasen ka lir saka parnok den menden lemsaba ajanga taruba sorkar akümba nung BJP-i teyari agütsütettsü” ta Johnny-i langzü.
Osangbenerisa pa dang BJP-i menden kwi nung takok angutsü imlar ta asüngdang saka pai iba atemabo osang tejangja mashi.
“Yashi ang election nung tokteptsüba candidate tem osang metetdaktsüogo aser tanü nungiang election mapa tenzüker. Anungji taruba anogo ishika sülen ang onoki shitettsü” ta pai langzü.
Johnny G. Rengma ya National Schedule Tribes Finance and Development Corporation nung Non-official Director lir aser paisa Prime Minister Narendra Modi-i aniba NDA sorkari lisopurtem aser talisa North East Region nung alirtem ajungkettsü atema mapa inyakba osang metetdaktsü.
Tsüklai 2 nungi küm asem mesüra tanga tetuyuba ka magütsü tashi NSTFDC, New Delhi indang Board of Directors nung Non Official Director inyaktsü atema Johnny shima liasü.
NSTDF ya 2011 küm Vajpayee’er sorkar mapang tenzükba liasü saka Congress-i aniba UPA sorkar mapang iba telok ya anenadok.
“Modi-i aniba sorkari North East region ajangzükdaktsütsü aser zünger mapa mangu aliba lanurtem nem senotsü aser loan teyari agütsütsü nükjidong nung iba telok asentenshia tenzük” ta paisa shisem.
Modi-i aniba sorkari tenzükba skill development scheme balala ajanga North East nung aliba lanurtemi ajangzüktsü imlar ta Johnny Rengma-isa ashi.