BJP party-i teyazü tenangzükba agütsüba Gaurav-i aitsü

Shillong, Tsüklai 15 (Agencies): Assam nungi Congress MP, Gaurav Gogoi-i, BJP party puri küm shia mapa crore anana adokdaktsütsü ta lanurtem nem teyazü tenangzükba agütsüba aitsüogo, aser paisa ashiba agi BJP puri Meghalaya nung aliba nüburtem nem teyazü tenangzükba aika keter parnok indang ‘vision document’ ka sayatsü.
BJP party indang ‘vision document’ document ya defence minister Nirmala Sitharaman-i sayatsü.
Shillong Congress Bhavan nung osangbenertem den sensaksemba mapang nung pa BJP puri Meghalaya nung sorkar kümtettsü asoshi merangba ya Trojan tongpang rara mapang Greek nungi Troy yimti-i amaktsü asoshi taila kor ka amshiba den medemdanga jembi.
Gaurav shibai constituency kar nung nüboyimba nung shilem agia liasü, pai ashiba agi, BJP-i aniba NDA sorkar aser Ato Kilonser Narendra Modi-i mapa agütsütsü asoshi nangzükba ya teyazü ulura lir.
“Ato kilonseri pai lanurtem nem mapa agütsütsü nangzükba tamakok nguogo ta yimdangi aruogo aser iba ajanga pai linük nung aliba nüburtem nem mapa agütsütsüba onük melena nashi, Ayodhya, Hindutva aser Nehru nunger indang jembi tenzükogo. Pai mapa agütsütsüba onük nungi pei sasa teka mapa bushia inyaktsüba onüki meyipogo aser iba ajanga BJP puri lanurtem nem mapa agütsütsüba nung tamakok anguba jangja jangja sayur,” ta paisa ashi.
Paisa ashiba agi, NDA sorkari 2015 küm labour-intensive sector ti nung mapa lakh 1.35 tang bendenloktsü koba 2011 küm UPA sorkar mapang nung mapa lakh 9.3 bendenloka liasü.
‘Alima ajunga atsüngzüka aoba mapang ka nung UPA sorkari 2009 küm mapa lakh 12.56 agütsüogo saka ibaji 2016 tashi nung lakh ana dang kümogo,” ta MP-i labour bureau figures ateshia ashi.
Paisa ashiba agi UPA sorkar mapang nung economy shilem 7 agi renloka liasü. Alima ajunga rongsen ketsüng nung atsüngzüka aoba mapang nung UPA sorkar kübok India economy masetshi liasü aser iba mapa ya India nunger atema ” achche din” ji liasü. “Parnoki koba amala ‘vision document’ ka sayatsü? parnoki teyazü tenengzükbatem dang agütsütsü,” ta paisa ashi.
Maneni paisa ashiba agi Meghalaya nung aliba nüburtem yimten yimsüsüba tsütsü kanga shisha taka lir aser parnoki BJP sendoktsü.