BJP puri Tripura nung President’s Rule akhanger

Agartala, December 6 (Agencies): State nung temzüng ozüng tsütsü tashi meite akümba, aser parnok züngsemtem mapang shia amakba dak sendakba nung BJP pur Mongolbarnü Tripur nung sangküm February ita Assembly election matong tsüngda President’s Rule benoktsü asoshi khangogo.
“BJP pusemertem aser züngsemtem aika CPI-M puri makogo aser tepsetogo. Onok indang party office aika CPI-M züngsemtemi raksatsüogo,” ta BJP state chief Biplab Kumar Deb-i West Kotowali police station kima nung longkaka aitaba sentong ka nung o jembidang ashi.
“Tatalokba ajak nung police temi kecha meshi toktsür mesera onok amaker tem lasa mindoker. BJP puri Tripura nung President’s Rule benoktsü asoshi akhanger, aji asünungdang Assembly election teunep nung aser ochi nung katettsü.
“Left Front puri dang sorkar tashi bener lira election matong tsüngda ano nisung aika asütsütsü,” ta paisa ashi.
Bharatiya Janata Party pusemertem aser züngsemtemi Mongolbarnü Tripura nung police station 76 aliba nungi 56 longbanga liasü.
BJP puri ashiba agi, Left Front sorkari state nung temzüng ozüng shidak mebenshi-i tamakok nguogo.
Inspector General of Police K.V. Sreejesh-i ashiba agi, BJP pur “Thana Gherao” sentong tesunep nung kaogo. “Onoki BJP pur aika puogo. Ajisüaka parnok chioadoktsü,” ta Sreejesh-i osangbenertem dang ashi.
Communist Party of India-Marxist (CPI-M) lenirtemi BJP pur kanga mejungi aitsüogo. “BJP puri ken o balala adokdaktsütsü asoshi merangba ya nüburtemi raksatsütsü,” ta CPI-M lenir Narayan Kar-i osangbenertem dang ashi.