BJP sorkari dang terenlok bener arur: Ramlal

Dimapur, November 17 (TYO): Nagaland nung taruba general election atema party-i mapa inyakbatem reprangshimtsü atema BJP National general secretary (org) Ramlal-i anogo asemnü atema Nagaland nung arua lir.
Hotel Saramati, Dimapur nung pai Cells & department Convenors aser co-convenors den ajurtepa sensaksem mapang ka agi.
Iba mapang Ramlal-i ashiba agi, BJP indang tongti süa bilembaji kin, tamangba yimsü aser telok kecha tebendang melii terenlok agütsütsü atema lir.
Rajasthan nung Khristan nütsüng yongsük 0.4% dang lir saka iba state nungi Rajya Sabha nung Union minister Alphonse Joseph lir. Iba ya ajanga BJP sorkari Khristan telok tilaba asoshi bilemtsür ta asüba kuli sayur, ta Ramlal-isa ashi.
Prime minister-i sensakertem atema tenzüktsüba scheme tem ajanga state aika nung takok nguogo. BJP-i sorkar küma aliba state aika nung sensakertem asoshi tenzükba welfare schemes ajanga aluyimertem ajak tajangzük angur. Tanga teloktemibo nangzükba dak alaka mapa meinyaktsür, saka BJP sorkar ajanga dang terenlok bener arutsür ta parnoki shisatetogo, ta Ramlal-isa shisem.
Ajay Jamwal General secretary (org) North East incharge-i Ramlal meina arua lir.