BJP Tir Amit-i mangatettep adoktsüsa jembi

Begusarai (Bihar), September 30 (Agencies): Mangatettep ken o adoktsüsa tanü BJP National Tir Amit Shah-i, India army temi Myanmar nung telungpur tesep amakbaji Narendra Modi’er sorkarji Congress dang nungi tesashiba ta sayuba liasü, ta jembiogo.
Bihar assembly election tenzüktsü anogo 12 shi dang lia Bihar, Begusarai nung nüboyimba sentong ka nung BJP Tir Shah-i Congress tatong Tir Rahul Gandhi aija jembiba mapang pai iba oji jembia liasü.
“Rahul ‘Baba’ – ozü yimsüsüba mapang nung shingaia shinga tepsettsü mulung moluteter. Kari danga merangra, onoki Burma arrtsü adena ia parnokji aniteter, ibaji Narendra Modi’er sorkar lir. Linük ka kümzüktsüji nai memetettsü. Linük kümzüka ayutsüji BJP atema tongtibangtiba onük lir. Nai kechi metet – nü tangatetbaji nütsü’er kibong tsütsülen sentakatepa alitsü,” ta Shah-i ashi.
Taküm June ita nung Manipur nung telungpurtemi army 18 tepsetba sülen India army temi Air Force den senteper Myanmar nung telungpur tesep ana amak.
Iba sülen minister temi o balala jembiba atema opposition party temi Modi’er sorkar aija liasü.
Iba mapang nungji Defence Minister Manohar Parrikar-i, “India tamentaktak tasen tsüburtemi anemtsü tenzükogo” ta jembi aser taoba mapang army officer aser tang Union minister Singh Rathore-i, iba operation ji tanga linüktem atema osang ka metetdaktsüba lir, ta jembia liasü.

You must be logged in to post a comment Login