Boko Haram-i N Cameroon nung 13 tepset

Yaounde, July 08 (Agencies): Nigeria nung tentetba kiralongrar telok, Boko Haram-i kidangsüa aliba North Cameroon nung ishiba agi nisung 13 shi yashi Mongolbar nü tepsetba osang jangjaogo ta sorkar ketdangsertemi metetdaktsüogo.

Parnokisa ashiba agi, sorkar mitkartemi Boko Haram züngsema 3 tashi yashi tepsetba osang jangjaogo.

“Boko Haram teloki Nigeria arrtsülen, Borno State den arrtsüsüa tentetba Bordo yimtsüng yashinep amaktsü tenzük aser sorkar mitkartemi lendong atalokdak tonga ao par telok den ghonda 5 shi tongpang raraba osang jangjaogo,” ta Cameroon Communication Minister, Issa Tchiroma Bakary-i tanü ashi.

Paisa ashiba agi, Boko Haram züngsem 3 indang tasümangji Cameroon lushi telung nung angu saka tanüngba amakertemi par züngsemtem indang tasümang ishika bener arrtsü adena Nigeria tsütsüleni jena ao.

“Yashinep lendong atalokba den sentakba osang ajakbo tang tashi monguteti lir saka ozü mitkartemi Boko Haram telok madak takok ngua tongpang raraba osang tejangjabo ngutetogo,” ta pai ashi.

“Ozü mitkartemi arrtsülen densemba tesem ajunga tali kümdangshia mitsü nangzüker,” ta shia, par mitkartemi yashi amakertemi abenba prongpong injang aika bena aruba den külemi, parnok mener aruba garitem aika raksatsüogo ta Tchiroma-i shisem.

“Ozü Cameroon lushi aser Cameroon nung alir nübur aser parnok meyong ki o jen ajunga kümzüka ayutsüji asoshi Cameroon sorkar aser mitkartemi tanen makai inyaktsü nangzüker,” ta pai metetdaktsü.

Boko Haram telok makdoktsü nükjidong nung Nigeria, Chad aser Cameroon mitkartemi lokteper mitkar telok tasen ka taküm February ita tentetba sülen tanü tashi nung Boko Haram teloki tan agi tanabenbuba tashi arrtsü adena Cameroon lushi nung amakba maparen inyaker lir.

Boko Haram teloki taküm March ita 3 nüa Cameroon anüdoklentip tsütsülen tentetba mosque aser tenlaki ishika rongdokja nübur ishika tepseta lendong atalokdaktsüba osang bushiteta lir.