Boko Haram-i relief camp nung nisung 11 tepset

Kano/Nigeria, September 2 (Agencies): Boko Haram jihadist temi Hokolbarnü civilian tem jenoka aliba camp ka amakdang nisung 11 tepset.
Nigeria-i Cameroon nung arrtsüa aliba tesem kübok Banki nung Boko Haram kiralongrartemi relief camp amak. Iba camp nung internally displaced people (IDP) 45,000 shi jenoka lir aser kotaritem amshia nisungtem tepset.
“Anepdang 12:30 ako meta Boko Haram kiralongrartemi IDP camp atsü raksar telungi ait. Parnoki IDPs nungi chiyungtsü auyazüka bener ao” ta jila nung sepai ketdangser kati ashi.
“Parnoki IDPs 11 tepset aser ana yirutsü” ta paisa shisem.
Boko Haram ya Nigeria kübok Muslim nunger aliba tesem nung Islamist state ka tentettsü alizüng yur mapa inyakba kiralongrar telok ka lir.
2009 nungi parnoki azütokshi mapa inyaka arudang nisung 20,000 shi tepsetogo aser nisung million 2.6 dak tema ki toktsür jena ogo.
Banki camp amakba osangji Adamu Ahmad ta ser civilian militia kati osang jangjashitsüogo.
Ahmad nungertemi Banki camp ji anüker aser pai ashiba agi, jihadist temi prangpong masü kotaritem amshia tepset.
Nigeria nung security forces-i chiyungtsütem nokdangba sülen Boko Haram pur teseptem nung kanga timtemer ta osang angazüker.
“Camp telung nung alirtem kari osang sangoktsüba sülen Boko Haram purtemi iba mapa inyak asütsü akok. Boko Haram kiralongrar kinungtsütem mesüra tanurtemi camp telungi aiter miima osangtem benden asütsü akok” ta ketdangserisa metetdaktsü.
Banki ya Maiduguri nungi kilometer 130 shi pilar lir. Iba camp ya March 2015 nung lapok aser Boko Haram nungi jena aoertem asoshi tejennokdak tajung ka liasü, saka tang Boko Haram kiralongrartemi iba camp mapang shia amaker.
Yaküm April ita tetsür anati bomb bener arua amakdang nisung 7 tashi pokset.
Taküm January ita arishi küm 10 tain tetsür tanur kati explosive vest semer aru saka tia ka camp kima nung apokdang la pokset.