Box-office nung Tiger Zinda Hai film maneni renloker

Aenjeti 12, 2018 (Agencies): Cinema tem nung tanü (Rogonü) Hindi film asem tasen sayaogo. Saif Ali Khan-i tongti shilem agiba Kaalakaandi film ya black comedy ka lir, Zareen Khan aser Karan Kundrra na tongti shilem agiba 1921 ya horror entertainment ka lir. Anurag Kashyap indang Mukkabaaz ya saisapong indang film ka lir.
Saka ite film tasen sayaka Salman Khan aser Katrina Kaif nati tongti shilem agiba Tiger Zinda Hai film ya box-office nung ticket tsütsü maneni renloka aoba mapang lir. Iba film ya Yisu asoba benjong mapang saya.
Tiger Zinda Hai film sayar hopta asem jungaka tanep sayuba nung nüburtemi reprangba ya film tasen asem sayaba nung repranger dang timba lir, ta mongintemi ashir. Ali Abbas Zafar-i direct asüba film ajanga Tentonü nungi tenzüka anogoshia sen crore 2.50 aazüker.
2012 küm yangluba Ek Tha Tiger film indang sequel ka ama yangluba Tiger Zinda Hai film ajanga hopta asem nung sen crore 318 aazüka lir. Iba film ajanga Bajrangi Bhaijaan film sayar tang tashi nung aazüka aliba sen dang timba aazüktettsü, ta mongintemi ashi. Bajrangi Bhaijaan ajanga tang tashi nung sen crore 320.34 aazüka lir aser iba film ya Salman indang film rongnung sen timtiba aazükba film liasü. Rogonü pongububa nung Salman Khan indang Tiger Zinda Hai film ajanga linük box-office nung sen timtiba aazüker kümogo.