Boxer tejen, Jake LaMotta süogo

New York City, September 20 (Agencies): Boxer tejen, Jake LaMotta arishi küm 95 nung alima nungi pilaogo. Robert De Nior-i “Raging Bull” movie nung LaMotta ama shilem agia lir.
Taoba world middleweight boxing champion, LaMotta ya nursing home nung pneumonia agi shiranga asü, ta LaMotta kinungtsüi osangbener dang ashi.
1970 küm LaMotta taküm otsü nung ajemdaker Raging Bull movie ya yanglu aser iba movie ya tsüngtepba ring tezülen LaMotta taküm otsü indang lir.
1980 küm Martin Scorsese-i direct asüba Raging Bull movie nungi Oscars nung De Nior-i Best Actor sempet angu.
“Ni nüburtm nem metetdaktsünüba ji, pa ya nisung tajung, tashi tait aser aria bilemba molungsentsü den asayamenü aketba nisung ka liasü,” ta LaMotta kinungtsü-i ashi.
LaMotta ya July 10, 1922 küm Italy nunger ka kibong nungi New York City nung aliba Bronx tesem nung aso aser pa temang nung mepetmesü aliba ajanga US mitkar nung magizükba ajanga boxing nung temolung agütsü.
Pa den tsüngteper dak jangja-jangja tsüngshitsü mechi pa den tsüngteperi pa dak atsüngba aremzük, ta sports commentator temi jembia aru.
Tsüngtepba mapang pa dak tashi balaka aliba ya pa tepuokdak aliba mapang ajangtet aser iba ajanga nüburtemi pa dang “The Bronx Bull” ta aja.

You must be logged in to post a comment Login