Brad Pitt-i Jennifer Aniston dang taitok meshi

Los Angeles, September 02 (Agencies): Actor Brad Pitt-i actress Jennifer Aniston dang pa kinungbo tamajung ka asüba aser pai la Angelina Jolie atema toktsüba taitok meshi, ta osang ajanga ashi.
Jolie-i Brad den balatsü asoshi tesüiba küm September ita nung ken o benoka liasü. Hollywood nung megastar ana ya küm ana tashi külemi ali aser dena ya 2004 küm nungi medema liasü. Tenati tanur trok tashi külemi mesütet.
Touch magazine ajanga Pitt-i tang ya kanga bilemdanger, aser iba bilemdangba ajanga pai Aniston dang pai aibelenbatem asoshi taitok meshitettsüsa tensa aru ta ashiba, mirror.co.uk. osang ajanga metetdaktsü.
“Pai la matsüngdang aibelenba ajunga asoshi taitok meshitsü melungteta yamaji inyakogo. Brad aser Jennifer Aniston na tsüngda iba ama temulung ajaki pei bilemba lemsatepbaji tan ya liasü,” ta osang ka ajanga ashi.
Pitt-i taitok meshiba mapang tesüiba mapang jashia aliba jenti bilemteta aru, ta kasa osang ajangasa ashi.
“Jen kanga temulung shirang. Küm jenti la temulung nung koremer aliba ajak tang temai adoka la nüktzü alua liasü,” ta kasa osang ajanga ashi.
Pitt-i taitok meshidang, ni kinungbo tamajung ka liasü ta temai adoka ashi, ta mirror.co.uk-i ashi.
“Brad Jen den aliba mapang lai nüngdakdang la kija toktsür nemzüba aser teti temesepba chiyungtsü agi meseper tezütangtsü kinüngbo ka asüba asoshi taitok meshi. Angelina atema la toktsür aobajia pa tai ta ashiba, osang nungjisa shisema lir.
Tang Aniston den kibong kümer alisang Justin Theroux-ia Pitt-i taitok meshiba agizükogo.