British sorkari Jallianwala atema tatok meshitsüla: Sadiq Khan

Amritsar, December 6 (Agencies): Amritsar nung 1919 Jallianwala Bagh nisung tepsetba atema British sorkari tatok meshitsüla ta London Mayor, Sadiq Khan-i ashi.
Sadiq Khan-i Mongulbar nungi Amritsar semdanger aser pai Jallianwala Bagh nung tasürtem nem tetushi agütsü.
“Jallianwala Bagh semdangdang temulung kanga raksar. Iba lendong nung tasür ajak asoshi aria bilemtsür” ta pai ashi.
“British sorkari tatok meshitsüla. 1919 nung atalokba lendongji kodanga mamatetba lendong ka lir” ta Sadiq-i Jallianwala Bagh nung aliba visitors’ book nung zülu.
April 13, 1919 nü Brigadier-General Reginald Dyer lenisüba kübok British nunger sepaitemi Baisakhi benjung amunger dak injang khaloktsü.
Iba lendong nung nisung aika asü aser taoba British Prime Minister David Cameron-ia
2013 küm Jallianwala Bagh semdangdang British putiotsü nung maaksü tatalokba ka lir ta ashi.
London Mayor Sadiq-isa tanü Golden Temple indang tekülem ki semdang aser tetushi agütsü.
Golden Temple complex semdangdang pai chiyungtsü renemba nung shilem agi aser chiyungtsü yangluba angazüktsü atema kanga jangraa liasü.
Shiromani Gurdwara Parbandhak Committee (SGPC) ketdangsertemi pa nem Siropa (robe of honour) ka sempet agütsü.
“Ni Amritsar nung arua amungba ya maongka tulu ka lir. Golden Temple ya London nung alir Sikh nunger meyirjang aika aser alima ajungalen million aika atema temeshi ki ka lir” tya Sadiq-i osangbener den jembidang ashi.
Mongulbar aonung Punjab Chief Minister Amarinder Singh-i London Mayor Sadiq atema dinner ayongzük.
UK-i India den tesentaktep akangshitsü atema Sadiq Khan-i yimti asem- New Delhi, Mumbai aser Amritsar tem semdangtsü atema aru.