BSNL-i puri nung WiFi amenogo

Puri (Odisha), July 09, 2015: Brihostibar nü Odisha, Puri nung Communications & Information Technology Union Minister, Ravi Shankar Prasad-i remote amshia BSNL complex tasenba lapoktsüba noksa nung angur.

Puri July 9 (Agencies): ‘Nabakalebar Rath Yatra’ benjung atongtsü hopta ka shi lia Puri nung BSNL-i tanü, Brihostibar nü WiFi amenoktsüogo aser iba mapang centre-i, iba service ya linük nung tourist temi kanga sapua semdangba tesem ajak nung inoktsütsü, ta metetdaktsüogo.
“Tourist temi semdangba tesem aser tamang aini aoertemi semdangba tesem ajak nung WiFi tekaraba nung amenoktsü,” ta Union Communications & IT Minister Ravi Shankar Prasad-i iba sentong lapoktsüba mapang metetdaktsü.
Nabakalebar, Rath Yatra aser gari benjung July 18 nü akaba mapang iba WiFi ya ‘Sri Jagannath temple’ aser ‘Mausi Maa temple’ na yongtsü aliba ‘Grand Road’ nung mezüng amshitettsü.
Union Minister-i, BSNL-i iba sentong atema sen crore 830 inoktsü koba ajanga Odisha nung WiFi tali tajungba akümtsü aser iba sen tesadang ka ‘broadband network’ atema amshitsü, ta ashi.
Prasad-i, “Centre-i linük nung mobile intong (tower) 818 amenoktsü sentong lir, tang tashi nung intong 194-bo yangluzükogo. Iba ya ajanga linük nung phone amshirtem asoshi network tali tajungba aser tashi taitba akümtsü,” ta ashi.
Pai, Ato Kilonser Narendra Modi sorkari ‘digital India project’ nung kanga bendanga agütsür, linük nung panchayat lakh 2.5 tashi ‘optical fiber’ agi sendaktepa akümtsü, ta ashi.
Digital India inyakim ajanga yimtak lir aser sensakertem kanga tajangzük angutsü, aser iba ya technology ajanga telungjem tali akangshitsü nükjidong nung tenzükba lir, ta paisa ashi.
Linük nung tang mobile phone amshir nisung crore 98 shi lir aser internet amshir nisüng crore 30 shi lir. Taruba küm ana tsüngda nung sorkari internet amshir nisüng crore 50 kümdangtsütsü nükjidong lir, ta Prasad-i ashi.
Kasa sentong nung adener, Union Petroleum Minister Dharmendra Pradhan-i, Sun Temple complex, Konark nunga WiFi amenokogo, ta ashi.