Budget 2018-19 ajanga ano shir junglongtsü?

Yangtepnü Union Finance Minister Arun Jaitley-i Budget 2018-19 sangdongogo aser iba nung Northeast state tem nem-a sen aika lemzüktsüogo. Finance Minister-i Northeast state 8 nem sen crore 43245 lemzüktsü aser ibaji 2016-17 budget (crore 32180) dang nungi crore 1000 den tema agi teimba lir. Maneni Finance Ministry-isa Ministry of Development of North East Region (DoNER) nem-a yaküm dang nungi 11.8% agi sen teimba lemzüktsüogo aser ibaji crore 2,682.45 lir. Centre sorkari Northeast nung air connectivity atema kanga temulung agüja arur aser iba jagi taküm Budget nung iba dak sendakba atema sen crore 1,014.09 enoka lir. Senji airport 50 asentenshitsü aser ano northeast tesem nung aviation infrastructure tajungba kümdaktsütsü nükjidong nung enokba lir. 2017-18 Budget nung Northeast nung air connectivity atema sen crore 200.11 enoka liasü saka taküm Budget nung iba dang nung punguben agi teimba enokogo. Budget 2018 nungsa north east state tem atema kanga tajangzük asütsü ta benoka aliba onük kaji aou indang lir. Finance Ministry-i National Bamboo Mission (NBM) nem sen crore 1,290 lemzüktsüogo aser iba ajanga northeast state tem kanga ajangzüktsü ta imlar, kechiyong northeast nung aou kanga talubo lir. Küm shia Centre sorkari northeast nem sen aika lemzüktsür aser state temi aginüba mesüra meshiba ajunga mesüaka tenük sünga lemzüktsür. Taküm Budget nung NE state 8 nem sen crore 43245 lemzüktsüba aser ano DoNER amala aser tanga ministry balala nungi asen Nagaland state-a sen crore meyirjang ishikabo atatsü südi saka sen paikaji kongi aotsü, kolen samatsü ta kanga shisabulua bilemer. Northeast tesem nung asen den kidangsüa aliba state tem reprangdangra, parnokbo tejakleni aoba mesüra terenlok aliba angur. Tatishitsü agi, Nagaland nungi gari nung mener Assam lushii mejaoka aidang gariji lenmang nung ajudoktsü ama khenyongi balaka akümer. Par state nungbo sorkar yimsüsürtem ajakji ochishir mesüra sen auyazüka machirtem dang ta shinürba masü. Parnoka nisung dang anungji Centre-i lemzüktsüba sen nungi auyazüka agiya alitsü saka parnok dak tajung ka ajitetbaji, parnokibo nübortem atema mapa inyaktsür, terenlok bener arutsü meranger aser iba tangatetbaji kanga tajung, saka Naga nunger sorkar yimsüsür aika dak iba tangatetba maliba ajiteter. Küm shia Centre-i Nagaland state nung terenlok mapa inyaktsü aser kechisarena atema sen crore meyirjangsa meyirjang agütsür saka osangkakettem mesüra sorkar sangdongtem nung sen lemzüktsüba/anguba angashiba dak alaka, sen jagi mapa inyakba mongbo mangur. Küm shia Centre-i lemzüktsüba sen nungi tesadang kati danga state sorkari mapa inyaka aru asübo Nagaland ya terenlok aliba state ka kümer lila, lenmang yamai mejungibo melila, aputem-a ajakbo mechirepi lila, sorkar mozü kitem nunga nüngdakba facility temibo anünga melila, saka tia maka public atema aruba senji public ket metongi nisung kar ang takarba akümba ajanga asen state teküpokleni lujen alur. Union Budget 2018-19 nung Northeast state tem nem sen aikasa lemzüktsüogo, anungji taküm-a Nagaland state nung shir junglongtsü’ar na ta tasüngdangba arur.