Candidate 195-i menden 59 atema tokteptsü; Neiphiu Rio den tetokteper shinga melii takok nguogo

Kohima, Tsüklai 12 (TYO): Tsüklai 27, 2018 Nagaland Assembly elections nung taoba mapang Chief Minister Neiphiu Rio den tetokteper shinga melii takok nguogo.
Election nung tokteptsü tenüng agütsüba meyipa agiba anogo tatembangba nung candidate 32-i tenüng meyipa agi aser parnok 29 indang nomination magizük.
13 buba NLA election nung Naga People’s Front (NPF)-i menden 58, Congress-i 18, BJP-i 20, JD(U)- 13, National People’s Party (NPP)-i 25, NCP-i 6, AAP-3, LJP-i 2 aser Nationalist Democratic Progressive Party (NDPP)-i menden 40 nungi tokteptsü. Maneni Independent ama tokteper parnok nisung 11 lir. Tan election nung menden ana nung toktepba candidate ji Nagaland nung retired Chief Secretary, Alemtemshi Jamir dang lir. Pai NDPP ticket amer Angetyongpang aser Mongoya constituency tem nungi tokteptsü.
Taoba mapang asemben tashi Chief Minister inyaksang, Neiphiu Rio-i Northern Angami-II nungi tokteper aser pa ‘uncontested candidate’ ta tanü sangoktsüogo. Pa den tokteptsü atema tenüng agütsüba NPF züngsem aser Ex-MLA, Chupfu-o-i tanü tenüng meyipa agi.
Constituency 15 nung NPF-BJP aser NPF-NDPP candidate tem tsüngda dang tokteptsü aser candidate teimba aliba constituency ji Mokokchung district kübok 21-Tuli Assembly Constituency lir. Iba constituency nungi candidate 7 lir.
12 buba NLA nung teinyakdak MLA 52 tashi taruba election nung tokteper.

You must be logged in to post a comment Login