Candidate temi pei income source metetdaktsütsüla: SC

New Delhi, Tsüklai 16 (Agencies): Rogonü Supreme Court-i, election nung tokteper candidate temi pa/la den apuani aser chirnurtem indang senotsü anguba lenmang (income source) metetdaktsütsüla, ta tetuyuba tasen ka agutsüogo.
Justice, J Chelameswar-i aniba bench-i, candidate temisa parnoki election nung tokteptsü atema tenüng agütsüdang pa indang, pa kinüngtsü aser chirnurtem indang income source metetdaktsütsüla, ta obendang agütsü.
Melungtet telok, Lok Prahari-i, candidate temi nomination file asüdang income source metetdaktsütsü atema Supreme Court nem temepishiba ka agütsü, aser iba ken o angadangba sülen SC bench-i iba oshidang agutsüogo.
Temepishiba benoker teloki, candidate temi nomination file asüdang pa meyong, kinüngtsür aser tanurtem indang kiojen aser rongsen metetdaktsür, ajisüaka sen aruba lenmangtem (income source) bo memetetdaktsür, ta metetdaktsü.
Tang aliba election temzüng-ozüng kübok, candidate kati election nung tokteptsü atema tenüng agutsüdang parnok rongsen aser kiojen iba den külemi parnok apuani aser chirnurtem indang rongsen aser kiojen metetdaktsütsü atema shia lir, ajisüaka sen aruba lenmangtem indangbo shia mali.
Candidate temi election nung toktepba mapang nung sayuba rongsenji election nung adokba sülenbo shilem 500 tashi timba -a akumer, saka sorkari itemji bushisüngdang masüba atema tamalen iba ken o angadangba mapang nung Supreme Court-i sorkar aija liasü.
Taküm Aenjeti (January) ita nung Election Commission-ia Supreme Court dang, election inyakyim teladak asütsü atema candidate temi election nung tokteptsü atema tenüng agütsüdang candidate, apuani aser chirnurtem income source metetdaktsütsüla, ta benoka liasü.

You must be logged in to post a comment Login