Case Premier League Honibarnü nungi tenzükogo

Case Premier League Honibarnü nungi tenzükogo

Dimapur, September 16 (TYO): 2buba Case Premier League Honibarnü tenzükogo. Asayamung ya Police Complex, DGP Ground, Chumukedima nung tanü Parliamentary Secretary Tovihoto Ayemi-i lapoktsüogo.
Sentong nung ojembidang Ayemi-i, sentong tajung ayongzükba atema league ayongertem tenüng sanga liasü. Pai ashiba agi, iba asayamung ya kati ka den sensak asemtsüba, longjemtsüba, temang anema ayutsüba atema sabang tajung ka lir.
“Asenoki asen nisungtem anema alitsüba ren nung ajungshitsü nüngdaker,” ta pai ashiba den külemi asayamung ayongertem dang maneni iba league asayaa nisung timba atsüa arua longjemdaktsütsü asoshi ajungshi.
Asayamung mezüngbuba asaya nung defending champions Trinity Sporting aser Case FC na asayaa liasü saka telok kati danga goal magütsüteti asaya tembang. Kanga dang tesasatsüka taoba asayamung nung goal timtiba agütsüsang Case FC nungi asayar Dr. Lipokba goal keeper den tsüktepba sülen tetsüng raksar masayateti tugoadok.
Tanü tanabuba asaya nung A1 Powerplay aser STAFAC United Patkai na kanga sütepa asayaogo. Asaya tatem tashi nung telok anapronglai goal 3-3 agütsür tembang.
Asayar tenzüker minute 5buba nung mezüngbuba goal A1 Powerplay nungi asayar Nito-i idaktsü. Asaya mezüngbuba shilem nung A1 Powerplay pur atema goal idaktsütsü asoshi maongka aiben nguteta liasü saka parnoki ka danga meidaktsü.
Ajisüaka asaya tanabuba shilem nung Akika-i maneni Yannath nem ball pass süja A1 Powerplay pur atema tanabuba goal agütsü.
Iba sülen Powerplay pur kanga ayonga asayaa liasü, saka STAFAC puria Keneivikho Khro ajanga parnok atema mezüngbuba goal idaktsü. Iba sülen minute tsüngda nung STAFAC nungi asayar Chui-i 18-yard box tema nungi ball kanga junga metsüokja par telok asoshi tanabuba goal agütsü.
Asaya nung maneni Powerplay pur goal keeper-i ball metsüdokba junga memetsüteti Chui-i keeper kolak ajanga goal kanga junga idaktsü.
Ajisüaka Powerplay puri maneni meranga asayar asaya tatemtsü lia Temsubai goal ka idakja asaya goal 3-3 nung tembang.
Tanü asaya tasembuba nung Nizams FC Dimapur aser G. Sporting Club na asayaba nung Nizams puri 2-0 agi kokogo. Asaya tetenzüklenbo G. Sporting Club-i amokbanger asayaa liasü. Asaya nung Nizams FC pur atema Bito aser Sopei nati goal kaka agüja liasü.

You must be logged in to post a comment Login