Case Premier League jersey sayaogo

Dimapur, September 13 (TYO): Bodhbarnü Tetso College, Dimapur nung Case Premier League ajanga jersey sayaba sentong ka agi. Iba unregistered football league ya professionals asayartem asoshi masü aser arishi küm 30 nungi tema atema dang lir. Iba asayamung ya September 16 nungi tenzüktsü.
Iba Case Premier League ya tanabuba edition asaya tenzüktsü lir aser iba asayamung nung shilem agitsüpurtem ya Trinity FC, Case FC, Nizams FC, STAFAC Patkai, G. Sporting Club aser A1 Powerplay nungi alitsü, ta Bodhbarnü iba asayamung indang jersey sayaba sentong nung jembidang Case Premier League nung Convenor, Rovikotuo Yhoshu-i ashi.
Iba tournament lapokba sentong ya September 16, 2017 anogo nikongdang 12:30 ako nung Police Ground nung agitsü aser iba sentong nung tongti tesemdanger Parliamentary Secretary, Tovihoto Ayemi asütsü, ta Organising Committee züngsem, Viketho Kechu-i ashi. Iba asayamung ya Police Ground, Chumukedima nung alitsü, ta pai-sa shisem.
Iba sentong nung jembidang, iba football league ya ‘non-professionals player’ arishi küm 30 tain nungi tema atema dang lir, ta Organizing Committee nung züngsem, Nchum Ovung-i ashi.
Iba league nung team shia nungi under-30 asayar ana asayadaktsütsü melar, saka arishi küm 25 dak tema asütsüla.
Case Premier League indang mezüngbuba edition ya taküm February nungi April ita tsüngda “Beyond Friendship, Beyond Fitness & Beyond Football” omen nung ajemdaker asaya liasü.