Catch Them Young tournament Kohima IG stadium nung tenzükogo

Dimapur, September 13 (Agencies): 10buba Inter District Catch Them Young Tournament 2017 Indira Gandhi Stadium, Kohima nung September 13, 2017 nü nungi tenzükogo. Iba asayamung nung tetoktepertem ya arishi küm 14 nungi tekübok dang lir aser parnok rongnungi tanobusangji küm 8 asayar ka lir. Iba anogo asem asayatsü aliba asayamung nung asayartem Badminton aser Athletics nung tokteptsü.
Asayamung lapokba sentong nung tongti tesemdanger YR&S, Joint Secretary, T. Sashimongba-i ashiba agi, iba asayamung nükjidongji meima aliba, sempet aketba asayartem bushiteta anepalutsüba lir. Paisa ashiba agi, India nung “Catch Them Young” Tournament mezüngbuba 1974 küm Nagaland nung tenzük, saka iba asayamung 1980’s mapang nung anenadok. Ajisüaka YR&S Department-i iba asayamung ya tongtibang ta angateta 2007 küm tenzükshi.
Paisa ashiba agi, iba asayamung nung shilem agitsü asoshi maongka anguba tanurtem kanga tia taka lir kechiyong parnok pei district nung asayar meyirejang aika rongnungi shimtetba lir. Pai tanurtem dang takok angutsü asoshi asayar yimya tajung benshitsüba, bendanga agütsütsüba aser temolungtetba tulu yur asayatsü asoshi ajungshi.
Iba asayamung nung district ajak nungi asayar ajak agi, 156 aser ketdangser 44-i shilem agidar. Tetoktepba nung shilem tajung agirtem yimya agi IG Academy nung parnok sempet maneni arangtetshitsü asoshi maongka angur.
Iba sentong nung IG Academy nungi anitetsang arishi küm 19tain lasang kashishir Kilenmeren nem YR&S Department-i tenüngsang tetushi agütsü. August ita pa Los Angeles, World Police meet nung shilem agi aser gold medal ana ngutetogo. Pa Nagaland police nung Havildar ka ama inyakdar aser tang Chumukedima aser IG Academy nung training tagidak lir.
Pa SSA ajanga Mopungchuket yimdak par school nung Archery introduce asüba sülen iba asaya nung shilem agi tenzük. Pa State Championships nung mezüngbuba shilem agi aser idakji pai Silver medal ka aser Bronze medal ka ta koktet. Iba sülen nungi pai lasang kashishiba asaya nung temolung agüja asayaa tenzük. Pa 70m Recurve asaya nung mongin lir aser pai maneni international jenjang balala nung toktepa linük aser state atema konang tetushi bener arutsütsü imlaba lemsatep.
Iba sentong Deputy Director YRS, Megolhu Dolie lenisüba kübok aka. Sentong nung Joel Solo-i ken ka aden. YRS, Director Linda Solo dena asayamung tenzükba sentong nung densema liasü.