Chakmas, Hajong refugee tem nem lisopur jenjang agütsütsü

Itanagar, September 13 (Agencies): Rohingya Muslim nunger dak sendakba nung mepetmesü adokba mapang teyalong nung Chakma aser Hajong refugee tem parnok lakh ka shi shirnok taoba East Pakistan nungi küm tenem tejakdang arua liasü aser tang northeast nung camp balala nung telidak lir parnok nem lisopur jenjang agütsütsü sangdongogo. Supreme Court-i ozüng agütsüba sülen iba jenjang ya agitsüba lir. SC-i 2015 küm Chakma and Hajong refugee tem nem lisopur jenjang agütsütsü asoshi Centre sorkar nem tetuyuba agütsüogo. Item refugee tem timba ka Arunachal Pradesh nung alir.
Home Minister Rajnath Singh-i Iba ken o dak sendakba nung Arunachal, Chief Minister, Pema Khandu, den sensak asemtsü, shibai refugee tem nem lisopur jenjang agütsütsü asoshi anema arudar. Parnoki ashiba agi, iba ajanga state indang demography melenshitsü, ta Home Ministry ketdangser kati ashi.
Centre sorkari iba ken o dak sendakba nung tangatettep ka dangi arutsü asoshi lenmang bushidang dar. Parnoki Chakma aser Hajong refugee tem nem Scheduled Tribes nem agütsüba maongka den ali senmang mamangdaktsütsü asoshi benokdangdar, ta ketdangseri ashi.
Ajisüaka refugee tem nem Inner Line permits bo agütsütsü aoko, koba Arunachal nung non-locals tem senzüsenpongtsü aser mapa inyaktsü asoshi nüngdaker. Chakma aser Hajong nunger ya East Pakistan ta sür aliba mapang nung Chittagong Hill Tracts nung lia alirtem lir, shirnok 1960’s mapang Kaptai tzü nokdang project ajanga parnok talidak metsüngbangba sülen pei tasoli toktsür aotsüsa aküm.
Chakma nungertem ya Buddhists aser Hajongs nungertem ya Hindu yimsü amangertem lir. Parnok tamangba yimsüdak sendakba nunga reshikangshiba ajanga Assam kübok Lushai Hills district (Tangbo Mizoram nung lir) ajanga India-i aittsüsa aküm. Centre-i parnok timba ka North East Frontier Agency (NEFA), leni yok koba tang Arunachal Pradesh lir.
Arunachal Pradesh sorkari Suprem court dang iba tetuyuba ya asadangshitsü asoshi mepishi saka amajok nung dang liasü. SC-i magizükba sülen Centre aser state sorkar na pronglai iba ken o bentettsü asoshi sensaksema arudar.
Myanmar nung Rohingya Muslim nunger rishikangshiba ajanga India nung parnok aika jenoka lir aser Centre-i parnok meyipa yoktsü asoshi sentong yangluba mapang ka nung Chakma aser Hajong refugee tem ken o ya temai adoker. Minister of State for Home Kiren Rijiju shiba Arunachal nungi lir, pai ashiba agi, Rohingyas nungerji ozüng alema linüki arurtem lir anungji parnok meyiba yoktsüla. Paisa ashiba agi, alima ajunga nung India-i refugee timba arur.