Chennai nung Naga sobaliba sentong ka agiogo

Dimapur, August 20 (TYO): Naga Students Union Chennai (NSUC) aser Naga Christian Fellowship Chennai (NCFC) nati külemi lungjemer Naga nunger sobaliba sentong ka Chennai kübok C.S.I. St.Matthias Church Parish hall kilung nung tan August ita 16 nü agiba osang ka tanü sangdong ka ajanga metetdaktsüogo.
Iba sentong nung taoba Chief Secretary, Nagaland, C.J.Ponraj, IAS (Rtd.) tetushi tejaoker liasü.
“Ni küm 34 tejaklen nungi tenzüka Naga nungertem den tesendaktep tajung ayutsü maongka angu aser Naga nunger sobaliba tajung ngua tangazükba jenti nguogo,” ta Ponraj-i metetdaktsü.
“Nisunger lokti tentet tajungba kümdaktsütsü asoshi Tsüngremi meimchir nem sobaliba ya agütsüogo. Naga kini pei sobaliba tajung aliba atema kanga dang pelatsüla, kechiyong sobaliba tajung aliba yong tanübo Naga nunger lokti tentet ajunga temaba jenjang nung lir,” ta pai aashi.
Kasa sentong nung NCFC Taramani cell group, Kevimedo, NSUC executive committee aser Tangkhul Students Union Chennai teloktemi ken tena shilem agi aser NCFC Sunday School department-i choreography ka ia sentepa alirtem ajungmeso.
K. Shimray, Chief Manager UIIC-i sentong nung shilem agirtem ayongzük aser NCFC sannüker, Pastor Wabang-i ‘One in Christ (1 Corinthians 12:12)’ omen nung ajemdaker Tsüngrem o lemsatepba sülen Naga yimtenren khuret bentettsütsü asoshi lokti sarasadem mapang ka agia liasü.
Suduvelu Rhakho-i aniba sentong nung Nokman Konyak, Tir, NSUC-ia tepela o jembi.