Chennai, September 16 (Agencies): Actor aser film yanglur Kamal Haasan-i pa nija party ka tentettsü, ta osangbenertemi ashi. Pai, superstar Rajinikanth politics nung aden nungbo nia pa den teka amteper aotsü, ta ashi. “Rajini küna tsüngda mongin mapa kar atema o lemsatepogo. Pa yimsüsüba tsütsüi meyipra yimsüsübaren jembitsü tasak masütsü. Pa politics nung ajemokra nia pa den adentsü. Mapa nungbo küna kanga toktepogo, ajisüaka tongtibang tebilemtsütem lemsateper,” ta Hokolbarnü Tamil osangbenertem den jembiba mapang Haasan-i ashi. Nü party tentettsü asoshi anogo tejangja shimteta lir ma? ta asüngdangdang pai, “Iba anogoji latettsü atema kecha arisangtsü mali,” ta langzü. Ita ishika tejakdang nungi Haasan-i Tamil Nadu yimsüsübaren indang kecha marendaki jembia arur. Haasan-i pa politics nung ajemoktsü indang terara jembisema arur. Kechi party ka asütsü ta asüngdangdanga pai, BJP bosa masütsü, ta langzüa lir.

New Delhi, September 16 (Agencies): Mepaitoktetba drugs aser ken o balala nung taküm piyong asonger, sorak-angtong agi naibang ama lia arusang, Bollywood star, Sanjay Dutt-i, tebu ka ama ni ozü jabasobo ni ama masütsü atema sarasademtsür, ta ashi.
Nüngtugu actor Sunil Dutt aser Nargis na jabaso, Sanjay-i drugs tongbang raraa liasü aser rehab nung amungba den külemi tsüngden chiokdaka küm ishika yuogo. Pa ya 1993 küm Mumbai nung tapoktsü tesashi ana apokdang nisung 250 asüba aser noklang aika yiruba lendong dak sendakba nung pai ozüng alema prangpong ka yua aliba atema apu.
New Delhi nung Honibarnü India Today Mind Rocks Youth Summit sentong nung Sanjay-i kecha miima meyui pai ajangshiba aser okrongba ajak lemsatepa liasü.
Nübu nena tsüngda kecha mesüktepa lir mali ta asüngdangdang pai, künaprong tebu ka ka lir. Tanur asem – jabaso Shahraan aser jala ana Trishala aser Iqra tebu, Sanjay-i, “Küboi onok tangar tanur ama dang anitet. Ni boarding school nung züngdaktsü …. Ni kanga meranga inyakba nisung ka aküm aser ozü tanur den yamaji kasa dang alir,” ta langzü.
“Ni parnok dang taküm nung nüngdakba ajak sayutsü, sobaliba nung tashi itta indaktsütsü, aser taintem akhümtsübutsü atema tesayuba agütsütsü kechiyong kilir dang ka süaka asen dang tantsü tambu dang akhümbutsüji kanga nüngdak… Ni oda ozü jabaso ni ama makümtsü atema sarasademer, tanaben ni lia aruba tensa amato majangshiner,” ta pai shisem.
Tebu Sunil dena “Munna Bhai M.B.B.S.” film nung tatembangsa külemi shilem agia lir. Pa tepuokdak aliba mapang khen mapang kabo pai, ni Sunil Dutt’er jabaso ser nung kechiba ni tepuokdak amunger, ta bilema liasü.
Arishi küm 58 tain, Sanjay-i, pa tetsüibo pa dak kodanga kecha tai mangu, ta ashi.
Tetsü ajak kasa dang — kechi komaka asüyonga tetsütemi pei jabasotem dak tai kangabo majitetter…. nisung kari, Sanju-i aibelen ka inyakogo, ta ashiyonga, lai ibaji mamangtet. Lai item nisungtem dangjisa jashia bilem,” ta pai pa lanuwa mapang menungra bilemteta ashi.
Pai meimba school züngertem den pai jembiba mapang parnok dang, “Temulungjang masü saka tekolok amshia bilemdangtsü kanga nüngdak,” ta ashi
“Nür tsüraburi ashiba teti angang aser na asoshi takoksa agütsü temba tinor yimteta mayutsüla. Teti kümdanga aser kümzüka alitsü merangang. Alima ozüngi ashiba nung anidakang, aser nenok lendongi maitsü,” ta shidi ka nung ajemdaker Arms Act kübok prangpong ka ayubaji tai ta memeteti nangzükba ajanga tepuokdak ayusang Sanjay-i lanurtem dang ashi.
“Parnoki kü ket nung prangpong ka lir ta ashi saka iba prangpongji parnoki kodanga mangu,” ta pai shisem.
“Ni college azüngba mapang drugs achitsü tenzük. Iba mapangji na drugs mechira tangar rongnung mezüngoker ka ama liasü. Anungji nia drugs achitsü tenzük. Ajisüaka ni iba temesepba mozü achitsü yimya kanga mejungi sübatetba ajanga iba nungjagi jenbutsü küm 10 tashi agi…ajisüaka oda ni iba nungjagi jenbutetüsa kechisarena maongka jenti ngutetbaji na asoshi kanga tia taka liasü,” ta ‘Khalnayak’ film nung tongti shilem agisang Sanjay-i ashi.
“Nü taküm, kibong mesüra nü mapaji na atema tongtibang kümdakjang. Ni drugs toktsüba sülen kü taküm jenjang nung jangratem meteta aru. Kecha oset agi na tangar dang nung balaka mekümdaktsütettsü. Aji ni ajangshia aruogo,” ta pai ashi.
Sanjay ya asenoki Omung Kumar-i direct asüba “Bhoomi” film nung angutsü. Iba film ya tebu aser par jala na otsü lir.

You must be logged in to post a comment Login