Chichiba Tsüngrem tembar

Tanü ama alima tejakleni aoba putu ka nung asenok lisemdang asenoki kanga junga shisadangra alima ya lenmang aika nung tejakleni kanga ogo. Tanü asüngbo jajaba nungi tenzüker osangtsüsang aser nüngdak balala ajak mopung nung dang abener. Mopung nung abenba tetezüji nüngdak balala ajak tekaratiba nung nükjidong atongtsü atema. Yangi tatishitsü ka ashir dangashi tanü lima nung kechisarena ajak yamaji renloka tejakleni oa lir. Tanü asüng alima tejakleni aoba  denji apaktepa ano tamajunglena yamaji temenen temai jateta adoka lir. Alemli alima tejakleni yamai mao asüdangbo mapa tamajung inyaktsübajia lenmang apara liasü, kechiyong azümesenertem chiyimdak tesem tezüngtet dang liasü, saka tanü asüngbo alima renlokba ajanga ano mapa tamajung inyaka temenen lenmang nung jajatsü bilemertem atemabo lenmang aisü nung kanga tezüba kümogo. Kümdanga aser saksalema melira, temeshi laishiba Apijemtsü Shin kaket nung ashiba ama,  nisung tsüngdang shitak mesükba lenmang lir, saka iba tatembangji tasüba ta asüba lenmang to tanü asüng asenok jakdang aika angur. Anungji koba lenmangi ao nungang Tsüngremi mulungba asütsü ta shisadanga tamanger shia anogoshia jajatsübaji nüngdaker. Aji oda mesürabang tenük masepshi nung temenen nem kinükleni atsür idaktsütsü, mesüra tamangerji temenen nung asonger alitsü. Kechiaser lenmang tai ser nung shitakba mesüka ngudaktsütsübaji temeneni mapa inyaker. Temenen ya kanga dang tesangra, pai Tsüngrem mekokakasa pa daka ain keta lir. Anungji temeneni iba ainji amshia Tsüngremer santem mesüzüka anir aotsü anogoshia meranger.  Tanü asüng ya balaka taoba tesem ajaklen tatidang agi sünga lir, anungji mapang ajak nung pei taküm mita alitsütsüla. Yisu sülen anidakertem ajaki meteta alitsüba kaji, mapang ajak nung saksalema alitsü merangakasa memeteti  temenen nem mesüzükdaktsür alir nung, oda anüalema dang lirabang parnok kolak nungjibo anogoshia mojing tsüngsanga chubatsü.  Anungji temenen nem mokokdaktsütsü atema amangbapurtem ajak anogoshia pei tamang mita alitsüla. Laishiba nung Tsüngrem dak chichia amanger nisung aika lir; Tsüngrem tembar Noa o Abraham ama alitsübaji Yisui akhanger. Laishibai ashir: “Aser tzümetsüng nungi jenbutsü Noa rongi ai, aser pa den pa chirtem, aser tebutsü, aser pa chir kibutsütem ai. Aser tzümetsüngji alima nung lirnü liasü; aser tzüji tali aküm aser rongji punga atu, aser ibaji ali nungi ajungketa atu. Aser tzümetsüngji tashi ita, alima nung kanga tali aküm;  aser rongji tzü manung pungdak.” Lipok 7:7; 17 & 18. Tanü ama putu nung asenok lia aodang, Noa ama pei tamang agi kibong ajak kümzüktettsüsa asenok anogoshia Pa den tesendaktep shitak lia, Tsüngrem tembar süa litettsübaji  tensa tia-i akhanger.  Ano Abraham-ia mapang ajak nung Kibuba lenmang nung jaja, iba jagi Pa dang Tsüngrem tembar ta aja. Laishibai ashir: “Aser Abrahami Tsüngrem dak amang aser pa atema aji temeshiba ama züngshi; koba laii ya ashir aji atalok; aser pa dang Tsüngrem tembar ta aja. Tamang agi dang masü, saka  mapa agi nisung metendaktsür ta nenoki angur… kechiyong kechi koda tanela meteni tamang tasü; aji oda mapa meteni tamanga tasü. Yakob 2:23-27. Asenoki tebang agi o aika jembitsüa akok, saka mapa agi inyaka mesayutetra ibaji yongmen yin takoshiba ola ka dang mesüka alitsü aser asen taküm yimya aser libaliro nung pur medemsortemi Yisu mangutsü. Mapang ajak nung Pai mulungba lenmang nung jaja nung dang asenok dang Tsüngrem tembar ta ajatsü; asenok  atangjibala Tsüngrem tembar  kümtet nung dang tangari asen dak Yisu angutsü.