Chile-i tan mezüngbuba atema Copa America takok marok nguogo

Santiago, July 5 (Agencies) : 2015 Copa America final nung Alexis Sanchez-i penalty tongtipangba metsüdang goal idaktsüba ajanga Chile-i Argentina akok aser tan mezüngbuba atema Copa America takok marok angu.

Taküm final asaya nung minute 120 tashi asayaba sülen penalty shoot-out aliba sülen ang Chile-i tatem nung takok angu.

Alexis Sanchez-i penalty metsüba sülen Chile-i 4-1 agi Argentina madak takok angu. Argentina asayartem rongnung Gonzalo Higuain-i penalty metsüpet aser Ever Banega-i metsüba ball ji Claudio Bravo-i noktangtet. Argentina nunger rongnung penalty idaktsürji Lionel Messi dang liasü.

Chile asayartem rongnung Sanchez-i goal meyokdang Matias Fernandez, Arturo Vidal aser Charles Aranguiz nungertem ajaki goal idaktsü.

Santiago nung aliba Estadio Nacional nung Argentina aser Chile na final asaya tenzükba sülen telok anapronglai kanga meranga asaya. Tetenzülen Argentina asayar Messi-i Sergio Aguero nem ball tajung ka yanglutsü saka Sergio-i goal magütsütet.

Ano Chile asayartem rongnung Vidal-i asaya tenzüker minute 11 buba nung Sanchez-i agütsüba ball metsü saka Argentina nunger Sergio Romero-i ball ji rakzük.

Asaya tenzüker minute 28 buba nung Argentina nunger Angel Di Maria tetsüng manemi akümba ajanga Ezequiel Lavezzi-i pa melenzük.

Ano minute 33 buba nung Gary Medel-i Messi tepok nung metsüba atema yellow card agüja merenshi.

Telong anapronglai kanga dang meranga asaya saka half time tashi nung goal 0-0 nung tembang.

Iba sülen asaya tanabuba shilem tenzüker asayadang telok anapronglai goal agütsütsü kanga merangtep. Minute 66 buba nung Sanchez-i Vidal nem ball tajung ka yanglutsü saka goal meyoktet.

Ano minute 82 buba nung Sanchez-i Aranguiz nungi anguba ball goalpost tsütsü metsü saka ball ji tezüleni ao. Iba sülen minute ishika dang lir Messi-i Lavezzi nem ball tajung ka yanglutsü saka pa offside liasü. Asaya tembang tashi nung telok anapronglai goal ka dang magütsütetba agi extra time asaya saka idangjiang goal magütsütetba agi tatem nung penalty shoot-out alitsüsa aküm.

Chile aser Argentina na tsüngda asayamung tulu nung asayadang Chile-i takok angubaji tan mezüngbuba lir.