China dang tongpang osettsüset mayoktsü: France

Washington, July 07 (Agencies): France-i China dang tongpang nung amshitsü osettsüset mayoktsü renemba osang ka French Defence Minister, Jean-Yeves Le Drian-i yashi Deobar nü metetdaktsüogo.

“France-i China dang tongpang osettsüset ayoktsü ta jembibaji olulu dang lir,” ta shia, par France-i China dang tongpang osettsüset mayoktsü renemba osangji Drian-i US Secretary of Defence, Ash Carter den yashi Pentagon nung ajurutepdang metetdaktsü.

Mistral-class amphibious assault rong 2 densema France-i tongpang nung amshitsü osettsüsettem China dang ayoktsü renemer ta aikati jembiba osang bushiteta lir.

Paisa ashiba agi, “China dang tongpang osettsüset mayoktsü terenemba lir aser kasaji ozü France-i benshitsü renema lir,” ta Drian-i nenshia ashi.

Tesüiba mapang, June 4, 1989 nung Bejing-i Tiananmen Square nung longkak aitba kaketshirtem anema tashiyim inyaka parnok songtemtsü merangba sülen China dang tongpang osettsüset mayoktsü lemtetba European Union (EU) züngsemtem rong nung France-a densema aliba osang jangjaogo.