China-i ECS nung totzü tutetba maparen anentsü akhanger: Japan

Tokyo, July 21 (Agencies): China-i mangatettep adoka aliba East China Sea (ECS) nung totzü aser gas tutetba maparen tekaraba mapang nung anentsü takhangba olen ka Japan-i tanü Mongolbar nü China sorkar den benokogo.

China-i tzüyim telung nungi totzü aser gas agitettsü maparen inyakba ajanga par Japan lushi nung densemba rongsena agiadoktsü akok ta temulung malemba olen ka metetdakja China-i tekaraba mapang nung totzü aser gas tutetba maparen anentsü takhangbaji benok ta Japan Defence Ministry-i tanü sangoktsü.

China-i küm 2 tejaklen, 2012 nungi tenzüka ECS nung totzü aser gas bushitsü maparen tenzükba osang bushiteta lir ta ministry ketdangser kati metetdaktsü.

Par linük anati külemi lungjemer tzüyim telung nung aliba totzü aser gas rongsen bushitsü tezüngzüktep agiba yong Beijing-i mangatettep adokba ECS nung totzü aser gas bushia kasaji tutetsü maparen meinyaki aru ta pai ashi.

“China-i mangatettep adoka aliba ECS nung totzü aser gas tutettsü maparen tenzükba osang tejangja bushitetogo. Anungji, China-i iba maparenji tekaraba mapang nung anentsü takhangba benokogo,” ta pai metetdaktsü.

China-i par totzü aser gas tutettsü asoshi renemba sabangji radar station mesüra drone aser iba amala tayimtsütem anendak ama amshia mangatettep adokba ECS nung senzüba rong aser tzüyim temalen yimzüba tayimtsütem mitsü akok ta ketdangsersangi temulung malemba olen ka metetdaktsü.

Ajisüaka, China’er defense aser foreign ministry nati Japan-i benokba takhangba olen nem telangzüba agütsüba osang tang tashi mejangjateti lir.

Ano külen, China-i mangatettep adokba ECS nung sabang kwi shi tenteta ali iba osangbo Japan’er Defense Ministry-i memetetdaktsü.

You must be logged in to post a comment Login